கஞ்சா விற்ற வாலிபரை கைது செய்து 26 கிலோ கஞ்சாவை காவல்துறையினர் பறிமுதல் செய்துள்ளனர்.
கோவை மாவட்டம், கருமத்தம்பட்டி அருகில் சோமனூர் பகுதியில் கஞ்சா விற்பனை நடைபெறுவதாக காவல்துறையினருக்கு ரகசிய தகவல் வந்துள்ளது. இத்தகவலின் பேரில் மாவட்ட போலீஸ் சூப்பிரண்டு பத்ரிநாராயணன் உத்தரவின்படி கருமத்தம்பட்டி இன்ஸ்பெக்டர் ராஜதுரை தலைமையிலான காவல்துறையினர் சோமனூர் சுற்றுவட்டார பகுதியில் தீவிர சோதனை மேற்கொண்டனர்.
அப்போது சோமனூரை அடுத்த நொய்யல் ஆற்றங்கரை பகுதியில் ரோந்து பணியில் ஈடுபட்டிருக்கும் காவல்துறையினரை பார்த்ததும் 3 பேர் தப்பி ஓடினார்கள். அதன்பின் காவல்துறையினர் அவர்களை சந்தேகத்தின் பேரில் துரத்தி சென்ற போது ஒருவர் மட்டும் பிடிபட்டுள்ளார். இதையடுத்து அவரிடம் நடத்திய விசாரணையில் அவர் மதுரை உசிலம்பட்டியில் வசித்துவரும் முருகசாமி(33) என்பதும், கஞ்சா விற்பனை செய்ததும் தெரிய வந்துள்ளது.
மேலும் அவரிடம் தொடர்ந்து விசாரணை மேற்கொண்டதில் அவர் தனது நண்பர்களுடன் சேர்ந்து விற்பனைக்காக அந்தப் பகுதியில் 26 கிலோ கஞ்சாவை மறைத்து வைத்தது தெரியவந்தது. இதையடுத்து காவல்துறையினர் அங்கு சென்று 26 கிலோ கஞ்சாவை பறிமுதல் செய்து முருக சாமியை கைது செய்துள்ளனர். மேலும் தப்பி ஓடிய 2 நபர்களை வலைவீசி தேடிவருகிறார்கள். இந்த கஞ்சா விற்பனையில் வேறு யாருக்கும் தொடர்பு இருக்கிறதா என்று காவல்துறையினர் தீவிர விசாரணை நடத்தி வருகின்றனர்.