வடகிழக்கு பருவமழை தொடங்கி உள்ளதால் சென்னை மற்றும் அதன் புறநகர் பகுதிகளில் இன்று காலை முதல் கன மழை பெய்து வருகிறது.
தமிழகத்தில் வடகிழக்கு பருவமழை துவங்கியுள்ளதால் பல்வேறு இடங்களில் மழை பெய்து கொண்டிருக்கிறது. கடந்த இரண்டு நாட்களாக தமிழகத்தின் கடலோர மாவட்டங்கள் மற்றும் மேற்கு தொடர்ச்சி மலையை ஒட்டியுள்ள அனைத்து பகுதிகளிலும் மழை பெய்து கொண்டிருக்கிறது. இந்நிலையில் தமிழகத்தில் வளிமண்டல மேலடுக்கு சுழற்சி காரணமாக இன்று முதல் அடுத்த நான்கு நாட்களுக்கு தொடர்ந்து மழை பெய்யும் என்று வானிலை ஆய்வு மையம் தெரிவித்துள்ளது.
இந்த நிலையில் சென்னை மற்றும் அதன் புறநகர் பகுதிகளில் இடியுடன் கூடிய கனமழை பெய்து கொண்டிருக்கிறது. சென்னையில் சென்ட்ரல், எண்ணூர், எழும்பூர், சிந்தாதிரிப்பேட்டை, ராயபுரம், திருவல்லிக்கேணி, கோயம்பேடு, வடபழனி, கோடம்பாக்கம், டிநகர், சைதாப்பேட்டை, கிண்டி புறநகர் பகுதிகளான பல்லாவரம், குரோம்பேட்டை, தாம்பரம், ஆலந்தூர், மேடவாக்கம், கோவிலம்பாக்கம், நங்கநல்லூர் உள்ளிட்ட பல்வேறு பகுதிகளில் மழை தொடர்ந்து பெய்து வருகிறது. சென்னையில் இன்று காலை முதல் மழை பெய்து கொண்டிருப்பதால் போக்குவரத்து நெரிசல் ஏற்பட்டுள்ளது. அதனால் வாகன ஓட்டிகள் அனைவரும் கடுமையாக பாதிக்கப்பட்டுள்ளனர்.