வரத்து குறைவு காரணமாக வெங்காயத்தின் விலை அதிகமாக உயர்ந்திருக்கிறது விரைவில் ஒரு கிலோ வெங்காயம் 100 ரூபாயை எட்டும் என்றும் எதிர்பார்க்கப்படுகிறது.
தொடர் மழையின் காரணமாக வெங்காயத்தின் விலை 50 விழுக்காடு உயர்ந்துள்ளது. விரைவில் ஒரு கிலோ வெங்காயத்தின் விலை ரூ 100 ரூபாயைத் தாண்டும் என எதிர்பார்க்கப்படுகிறது. தமிழகத்தில் விற்பனை செய்யப்படும் பெரிய வெங்காயம் மகாராஷ்டிரா மற்றும் கர்நாடகாவில் இருந்து கொண்டு வரப்படுகின்றன. தற்பொழுது அந்த மாநிலங்களில் பெய்து வரும் தொடர் மழையின் காரணமாக தமிழக சந்தைகளுக்கு பெரிய வெங்காயத்தின் வரத்து குறைந்து வருகிறது. இதன் காரணமாக கடந்த சில நாட்களுக்கு முன்பு ஒரு கிலோ பெரிய வெங்காயம் 40 ரூபாயில் இருந்து 50 ரூபாய் வரையில் விற்பனை செய்யப்பட்டது.
தற்போது வரத்து குறைவின் காரணமாக ஒரு கிலோ பெரிய வெங்காயம் 80 ரூபாய்க்கு விற்பனை செய்யப்படுகிறது. அதேபோன்று திண்டுக்கல், திருச்சி பகுதியில் விளைவிக்கப்படும் சின்ன வெங்காயம் தொடர் மழை காரணமாக அழுகும் நிலையில் உள்ளது. இதனால் கடந்த வாரங்களில் 50 ரூபாய் வரையில் விற்பனை செய்யப்பட்ட சின்ன வெங்காயத்தின் விலை இன்று 90 ரூபாயாக உள்ளது. சென்னை கோயம்பேடு காய்கறி சந்தைக்கு நாள்தோறும் 60 லாரிகளில் வந்த வெங்காய மூட்டைகள் தற்போது தொடர் மழை காரணமாக 30 லாரிகளில் மட்டுமே வருகிறது. இதனால் வெங்காயத்தின் விலை கிடுகிடுவென உயர்ந்துள்ளது. மேலும் தொடர்ந்து மழை நீடிக்கும் என்பதால் வெங்காயத்தின் விலை விரைவில் கிலோ 100 ரூபாயை எட்டும் என்று வியாபாரிகள் தெரிவித்துள்ளனர்.