நியூ சவுத் வேல்ஸ் மாநிலத்தில் வரலாறு காணாத கன மழை பெய்து வருவதாக தகவல் வெளியாகியுள்ளது.
ஆஸ்திரேலியாவின் வடகிழக்கு பகுதியில் கடந்த சில நாட்களாக நியூசவுத்வேல்ஸ் மற்றும் குயின்ஸ்லாந்து மாநிலங்களில் கனமழை பெய்து வருகிறது. இந்த கன மழையால் குயின்ஸ்லேன்ட் மாநிலம் கடுமையாக பாதிக்கப்பட்டுள்ளது. இதனைத் தொடர்ந்து தலைநகர் பிரிஸ்பேன் மற்றும் பல நகரங்களில் கடந்த 22ஆம் தேதி முதல் கனமழை பெய்து வருவதால் வெள்ளத்தில் தத்தளிக்கின்றன. இந்த கனமழையால் சுமார் 18 ஆயிரம் வீடுகள் வெள்ளத்தில் மூழ்கி உள்ளது. மேலும் ஆயிரக்கணக்கான மக்கள் வீடுகளை இழந்து நிவாரண முகாம்களில் தங்க வைக்கப்பட்டுள்ளர். மேலும் 50 ஆயிரத்துக்கும் மேற்பட்ட வீடுகளில் கனமழை காரணமாக மின்சாரம் துண்டிக்கப்பட்டு இருளில் மூழ்கி உள்ளதாக தகவல் வெளியாகி உள்ளது.
இதற்கிடையில் நியூ சவுத் வேல்ஸ் மாநிலம் நோக்கி கனமழை நகர்ந்து வருகிறது. இதனால் வரலாறு காணாத மிக மோசமான வெள்ள பாதிப்பை லிஸ்மோர் நகரம் எதிர்கொள்ளும் என்று தகவல் வெளியாகியுள்ளது. இந்த மாநிலங்களில் பெய்து வரும் கன மழையால் 9 பேர் உயிரிழந்துள்ளதாகவும் பலர் காணாமல் போனதாகவும் தகவல் வெளியாகியுள்ளது. மேலும் வெள்ளம் பாதிக்கப்பட்ட பகுதிகளில் மீட்பு பணிகள் நடைபெற்று வருவதாக அதிகாரிகள் தெரிவித்துள்ளனர்.