வாகன புகை பரிசோதனை கருவி குறித்து போக்குவரத்து ஆணையர் பிறப்பித்த சுற்றறிக்கையை ரத்து செய்யக்கோரி வழக்கு தொடர்ந்தவருக்கு ஒரு லட்சம் ரூபாய் அபராதம் விதித்து சென்னை உயர்நீதிமன்றம் உத்தரவிட்டுள்ளது.
தமிழகத்தில் வாகன புகை பரிசோதனை கருவிகளை தயாரிக்கும் 12 நிறுவனங்கள் உள்ள நிலையில் புதுச்சேரியில் உள்ள நிறுவனத்தின் வாகன புகை பரிசோதனை கருவிகளை புகை பரிசோதனைக்கு பயன்படுத்தலாம் என்று மண்டல போக்குவரத்து அதிகாரிகளுக்கு தமிழக போக்குவரத்து ஆணையர் சுற்றறிக்கை அனுப்பினார். இது குறிப்பிட்ட ஒரு நிறுவனத்தை ஊக்கப்படுத்தும் வகையில் உள்ளதாக கூறி போக்குவரத்து ஆணையாரின் சுற்றறிக்கையை ரத்து செய்யக்கோரி ராமச்சந்திரன் என்பவர் சென்னை உயர்நீதிமன்றத்தில் வழக்கு தொடர்ந்திருந்தார்.
வழக்கை விசாரித்த நீதிபதி என் ஆனந்த் வெங்கடேஷ் தகுதிவாய்ந்த நிறுவனங்களுக்கு வாய்ப்பு வழங்கப்பட்டுள்ளதாக போக்குவரத்து ஆணையர் தரப்பில் தெளிவுபடுத்தப்பட்டுள்ளதை சுட்டிக்காட்டி வழக்கை தள்ளுபடி செய்து உத்தரவிட்டார். மேலும் தவறான குற்றச்சாட்டுகளுடன் வழக்கு தொடர்ந்த மனுதாரருக்கு ஒரு லட்ச ரூபாய் அபராதம் விதித்து நீதிபதி அந்த தொகையை சென்னை அடையாறு புற்றுநோய் மருத்துவமனைக்கு 4 வாரங்களுக்குள் செலுத்த வேண்டும் என்று உத்தரவிட்டுள்ளார்.