கடைக்குள் புகுந்த சிறுத்தை பூனை குட்டியை தீயணைப்புத்துறையினர் பத்திரமாக மீட்டனர்.
நீலகிரி மாவட்டத்திலுள்ள குன்னூர் மற்றும் அதனை சுற்றி உள்ள வனப்பகுதியில் ஏராளமான வனவிலங்குகள் வாழ்ந்து வருகின்றன. இந்த வனவிலங்குகள் உணவு மற்றும் தண்ணீரை தேடி குடியிருப்பு பகுதிக்குள் நுழைகிறது. இந்நிலையில் சிறுத்தை பூனைக்குட்டி ஒன்று வழி தவறி குன்னூர் நகருக்குள் நுழைந்து அங்கும் இங்கும் நடமாடியது. அதன் பிறகு சிறுத்தை பூனை குட்டி அங்கிருந்த கடைக்குள் புகுந்ததை பார்த்து அதிர்ச்சி அடைந்த உரிமையாளர் உடனடியாக தீயணைப்பு துறையினருக்கு தகவல் தெரிவித்துள்ளார்.
அந்த தகவலின் படி சம்பவ இடத்திற்கு விரைந்து சென்ற தீயணைப்பு நிலைய வீரர்கள் சிறுத்தை பூனை குட்டியை மீட்டு வனத்துறையினரிடம் ஒப்படைத்தனர். இதனை அடுத்து சிறுத்தை பூனை குட்டியை வனத்துறையினர் பாதுகாப்பாக அடர்ந்த வனப்பகுதிக்குள் கொண்டு விட்டனர்.