லாரி சக்கரத்தில் சிக்கி கணவன் கண்முன்னே பெண் உயிரிழந்த சம்பவம் சோகத்தை ஏற்படுத்தியுள்ளது.
சென்னை மாவட்டத்திலுள்ள காரனோடை பகுதியில் பிரேம்குமார் என்பவர் வசித்து வருகிறார். இவருக்கு பரிமளா என்ற மனைவி இருந்துள்ளார். இவர்களுடைய உறவினர் ஒருவர் சபரிமலைக்கு மாலை அணிந்து செல்கிறார். அவரை வழியனுப்புவதற்காக தம்பதியினர் இருவரும் வண்ணார்பேட்டை நோக்கி மோட்டார் சைக்கிளில் சென்றுள்ளனர்.
இவர்கள் எருக்கஞ்சேரி நெடுஞ்சாலையில் சென்று கொண்டிருந்த போது பின்னால் வந்த மாநகராட்சி குப்பை லாரி தம்பதியினரின் மோட்டார் சைக்கிள் மீது பலமாக மோதியது. இந்த விபத்தில் நிலைதடுமாறி கீழே விழுந்த பரிமளாவின் மீது லாரியின் முன்பக்க சக்கரம் ஏறி இறங்கியதால் உடல் நசுங்கி சம்பவ இடத்திலேயே அவர் பரிதாபமாக உயிரிழந்துவிட்டார். இந்த விபத்தில் லேசான காயங்களுடன் பிரேம்குமார் அதிர்ஷ்டவசமாக உயிர் தப்பிவிட்டார்.
இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று பரிமளாவின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் குப்பை லாரி ஓட்டுனரை கைது செய்து விசாரணை மேற்கொண்டு வருகின்றனர்.