உலகம் முழுவதும் அதிக அளவில் பயன்படுத்தப்படும் செயலி வாட்ஸ்அப். உள்ளூர்வாசிகள் முதல் வெளிநாடுகளில் இருப்பவர்கள் வரை அனைவருமே புகைப்படம் வீடியோ மற்றும் முக்கிய ஆவணங்கள் ஆகியவற்றை வாட்ஸ்அப் மூலமாக பகிர்ந்து கொள்கின்றனர். சிறுவர்கள், இளைஞர்கள், முதியவர்கள் என அனைத்து தரப்பினரும் வாட்ஸ் அப் செயலியை பயன்படுத்துகின்றனர். சாட்டிங், வீடியோ கால், தரவுகள் பகிர்வுகள் உள்ளிட்ட பயன்பாடுகளுக்காக பல்வேறு செயலிகள் உருவாக்கப்பட்டு இருந்தாலும், அவற்றில் முதன்மையானது வாட்ஸ்அப்.
வாட்ஸ்அப் முதன்மையாக இருப்பதற்கு காரணம் அடிக்கடி புதுப்புது அப்டேட்களை வெளியிடுவதுதான். அதேபோல் இப்போதும் ஒரு புதிய வசதியை அறிமுகம் செய்துள்ளது. அதாவது வாட்ஸ் அப்பில் பகிரப்படும் புகைப்படங்களை ஒருமுறை மட்டுமே பார்க்கும் புதிய வசதியை வாட்ஸ் அப் அறிமுகம் செய்துள்ளது. பயனாளர்கள் அட்டாச் ஃபயில் பட்டன் மூலமாக புகைப்படங்கள் அல்லது வீடியோக்களை பகிரும் போது, செண்ட் பட்டனுக்கு முன்னதாக ஒன்று என வட்டமிட்ட பட்டன் திரையில் தோன்றும். அதன்மூலம் தேர்வு செய்து அனுப்பப்படும் தரவுகளை ஒரு முறை மட்டுமே பார்க்க முடியும்.
அதேநேரத்தில் வழக்கம்போல் பகிரப்படும் தரவுகள் பழைய முறைப்படி பயனாளர்களுக்கு செல்லம். இதன் மூலம் ஒரு நபருக்கு தவறுதலாக புகைப்படம் அனுப்பப்பட்டால் கூட அதனை ஒருமுறைக்கு மேல் அவர்களால் பார்க்க முடியாது. அதேநேரத்தில் புகைப்படத்தை ஸ்க்ரீன்ஷாட் எடுத்துக் கொள்ளும் வசதியில் எந்த மாற்றமும் இல்லை. இதனால் முதலில் புகைப்படத்தை பார்ப்பவர்கள் அதனை ஸ்க்ரீன்ஷாட் எடுத்துக்கொள்ள வாய்ப்பு உள்ளது. எதிர்காலத்தில் இதனை சரி செய்து, புதிய அப்டேட்டை வாட்ஸ்அப் நிறுவனம் வெளியிடவும் வாய்ப்புள்ளது.