இந்திய அணியில் வாய்ப்பு கிடைக்கும் போதெல்லாம் இளம் ஓபனர் பிரித்வி ஷா சிறப்பாக விளையாடி வந்ததால் பலரும் இவரை பாராட்டி வந்தனர். மேலும் பிரித்வி ஷா மீது இருந்த அதீத நம்பிக்கையால் ஆஸ்திரேலியா அணிக்கு எதிரான டெஸ்ட் தொடரில் அவருக்கு வாய்ப்பு வழங்கப்பட்டது. ஆனால் அனைத்துப் போட்டிகளிலும் களமிறங்கிய அவர் 2 ஓவர்கள் கூட தாக்கு பிடிக்க முடியாமல் சொதப்பினார். இதையடுத்து பேட்டிங்கில் முதிர்ச்சி தன்மை இல்லாத காரணத்தினால் அடுத்தடுத்த தொடர்களில் அவரை சேர்க்கவில்லை.
இருப்பினும் கடின பயிற்சிகளை மேற்கொண்ட பிரித்வி ஷா உள்ளூர் தொடர், ஐபிஎல் தொடரில் சிறப்பாக விளையாடி ரன் மழை பொழிந்தார். இருப்பினும் மேற்கிந்திய தீவுகளுக்கு எதிரான அணியில் பிரித்விஷாவுக்கு இடம் கிடைக்கவில்லை. இந்த நிலையில் ஆஸ்திரேலிய அணியின் முன்னாள் கேப்டன் மைக்கேல் கிளார்க் பத்திரிக்கையாளர்களுக்கு அளித்திருந்த பேட்டியில், பிரத்வி ஷாவை புகழ்ந்து பேசியுள்ளார். அதாவது “பிரித்வி ஷா இந்திய அணியின் முன்னாள் வீரர் வீரேந்தர் சேவாக்கை போல ஆக்ரோஷமான வீரர்.
கிரிக்கெட் நுணுக்கங்கள் பற்றி சேவாக்கிற்கு தெளிவாக தெரியும். எனவே சேவாக் நேரத்திற்கு தகுந்தாற்போல் விளையாடுவார். இதனாலேயே எனக்கு அவரை அதிகம் பிடிக்கும் என்று கூறினார். மேலும் பிரித்வி ஷாவும் அவரைப் போலவே செயல்பட முடியும். இந்திய அணி நிர்வாகம் அவரை முதலில் நம்ப வேண்டும். பிரித்வி ஷா இளம் வீரர் என்பதால் அவரிடம் இருந்து அதிகம் வெற்றிகளை எதிர்பார்க்க முடியும். எனவே இந்திய அணி அவருடைய திறமையை நிரூபிக்க அதிக வாய்ப்புகளை வழங்க வேண்டும்” என்று தெரிவித்துள்ளார்.