தமிழ் சினிமாவில் பிரபலமான நடிகராக வலம் வரும் தளபதி விஜய் நடிப்பில் வெளியான பீஸ்ட் திரைப்படம் வெளியாகி கலவையான விமர்சனங்களை பெற்றாலும், வசூல் ரீதியாக சாதனை படைத்தது. இவர் தற்போது வம்சி இயக்கத்தில் வாரிசு என்ற திரைப்படத்தில் நடித்து வருகிறார். இந்த படத்தில் நடிகை ராஷ்மிகா மந்தனா ஹீரோயின் ஆக நடிக்க, பிரகாஷ் ராஜ், பிரபு, சரத்குமார், சாம் மற்றும் யோகி பாபு உள்ளிட்டோர் முக்கிய வேடங்களில் நடித்துள்ளனர். இந்த படத்தில் விஜய்யை சற்று மாறுபட்ட கதாபாத்திரத்தில் பார்க்கலாம் என படக் குழுவினர் கூறியுள்ளதால், வாரிசு திரைப்படத்தின் மீதான எதிர்பார்ப்பு ரசிகர்கள் மத்தியில் அதிகரித்துள்ளது.
இந்த படம் அடுத்த வருடம் பொங்கலுக்கு திரையரங்குகளில் ரிலீஸ் ஆகும் என படக்குழுவினர் அறிவித்துள்ளனர். அதன்பிறகு வருகிற டிசம்பர் மாதம் இசை வெளியீட்டு விழா பிரம்மாண்டமாக நடைபெற இருப்பதாக தற்போது அறிவிப்பு வெளியாகியுள்ளது. ஏற்கனவே பீஸ்ட் திரைப்படத்திற்கு இசை வெளியீட்டு விழா நடத்தப்படாத நிலையில், தற்போது வாரிசு திரைப்படத்திற்கு இசை வெளியீட்டு விழா குறித்து அறிவிப்பு வெளியானதால் விஜய் ரசிகர்கள் மிகுந்த மகிழ்ச்சியில் இருக்கின்றனர்.