காவல்நிலையத்திற்கு விசாரணைக்கு அழைத்து செல்லப்பட்ட வாலிபர் மர்மமான முறையில் உயிரிழந்த சம்பவம் அப்பகுதியில் பரபரப்பை ஏற்படுத்தியுள்ளது.
ராமநாதபுரம் மாவட்டம் முதுகுளத்தூரை அடுத்துள்ள கீழத்தூவல் காவல்துறையினர் அப்பகுதியில் வாகன சோதனையில் ஈடுபட்டிருந்தனர். அப்போது அப்பகுதி வழியாக நீர்கோழினேந்தல் பகுதியை சேர்ந்த மணிகண்டன் என்ற வாலிபர் இருசக்கர வாகனத்தில் சென்றுள்ளார். இந்நிலையில் காவல்துறையினரைபார்த்ததும் அவர் வாகனத்தை நிறுத்தாமல் வேகமாக சென்றதாக கூறப்படுகிறது. இதனால் காவல்துறையினர் அவரை விரட்டி சென்று மடக்கி பிடித்து காவல் நிலையத்திற்கு அழைத்துச் சென்று விசாரணை நடத்தியுள்ளனர்.
இதனையடுத்து விசாரணை முடிந்த பின் வீடு திரும்பிய மணிகண்டன் சிறிது நேரத்திலேயே மர்மமான முறையில் உயிரிழந்துள்ளார். இந்நிலையில் காவல் நிலையத்திற்கு அழைத்து சென்று வாலிபரை துன்புறுத்தி கொலை செய்துள்ளார்களா என மணிகண்டன் உறவினர் தரப்பில் சந்தேகம் எழுந்துள்ளது. ஆனால் இதனை காவல்துறையினர் மறுத்து மணிகண்டனை தாக்கவில்லை என கூறியுள்ளனர். மேலும் வாலிபரின் மரணத்திற்கு உரிய நடவடிக்கை எடுக்குமாறு அவரது உறவினர்கள் மற்றும் கிராம மக்கள் பரமக்குடி-முதுகுளத்தூர் சாலையில் மறியலில் ஈடுபட்டுள்ளனர்.
இதனை அறிந்த ராமநாதபுரம் குற்றப்பிரிவு துணை சூப்பிரண்டு அதிகாரி திருமலை, முதுகுளத்தூர் துணை சூப்பிரண்டு அதிகாரி ஜான் பிரிட்டோ மற்றும் காவல்துறையினர் சம்பவ இடத்திற்கு விரைந்து சென்று பொதுமக்களிடம் பேச்சுவார்த்தை நடத்தியுள்ளனர். இதனையடுத்து மணிகண்டனின் சாவு குறித்து உரிய நடவடிக்கை எடுக்கப்படும் என உறுதியளித்த பின்னரே அவர்கள் சாலை மறியலை கைவிட்டு கலைந்து சென்றனர். இதனால் அப்பகுதியில் 1 மணி நேரம் போக்குவரத்து பாதிப்பு ஏற்பட்டுள்ளது.