வீட்டிற்குள் சிறுத்தை புலி புகுந்த சம்பவம் பொதுமக்களிடையே அச்சத்தை ஏற்படுத்தியுள்ளது.
கோயம்புத்தூர் மாவட்டத்தில் உள்ள வால்பாறை அருகே நடுமலை ஸ்டேட் வடக்கு பிரிவில் தேயிலை தோட்ட தொழிலாளியான பாக்கியம் என்பவர் வசித்து வருகிறார். நேற்று அதிகாலை பாக்கியம் தனது வீட்டில் சமையல் செய்து கொண்டிருந்த போது பக்கத்து அறையில் பூனை ஒன்று அமர்ந்திருந்தது.
இந்நிலையில் வனப்பகுதியில் இருந்து தேயிலை தோட்டம் வழியாக குடியிருப்பு பகுதிகள் நுழைந்த சிறுத்தை புலி பூனையை பார்த்து அதன் மீது பாய்ந்து பிடிக்க முயற்சி செய்தது. உடனடியாக சமையலறையின் மேற்கூரை மீது தாவி பூனை தப்பித்து சென்றது. அப்போது சிறுத்தை புலி சமையல் அறைக்குள் அங்குமிங்கும் ஓடியதால் பாக்கியம் அதிர்ச்சியடைந்து கூச்சலிட்டார். உடனே சிறுத்தை புலி அறையை விட்டு வெளியே ஓடியது. இந்த சம்பவம் அப்பகுதியில் பரபரப்பை ஏற்படுத்தியுள்ளது.