மோட்டார் சைக்கிள் மீது அரசு பேருந்து மோதிய விபத்தில் கல்லூரி மாணவர் உயிரிழந்த சம்பவம் சோகத்தை ஏற்படுத்தியுள்ளது.
மதுரை மாவட்டத்திலுள்ள செல்லூர் பகுதியில் கல்லூரி மாணவரான இன்பராஜ் என்பவர் வசித்து வந்துள்ளார். இந்நிலையில் இன்பராஜ் தனது நண்பரான பரத் என்பவருடன் மோட்டார் சைக்கிளில் விக்கிரமங்கலம் நோக்கி சென்று கொண்டிருந்தார். இவர்கள் நாராயணபுரம் விக்கிரமங்கலம் சாலையில் சென்று கொண்டிருந்த போது அவ்வழியாக வேகமாக வந்த அரசு பேருந்து இன்பராஜின் மோட்டார் சைக்கிள் மீது பயங்கரமாக மோதியது. இந்த விபத்தில் படுகாயமடைந்த இன்பராஜ் சம்பவ இடத்திலேயே பரிதாபமாக உயிரிழந்துவிட்டார்.
அதன்பின் படுகாயமடைந்த பரத்தை அருகில் உள்ளவர்கள் மீட்டு மருத்துவமனையில் சிகிச்சைக்காக அனுமதித்தனர். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று மாணவரின் சடலத்தை கைப்பற்றி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். மேலும் இதுகுறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.