தீ விபத்து ஏற்பட்டதால் 17 ஸ்கூட்டர்கள் எரிந்து நாசமான சம்பவம் பரபரப்பை ஏற்படுத்தியுள்ளது.
சென்னை மாவட்டத்திலுள்ள போரூர்-குன்றத்தூர் பிரதான சாலையில் ராஜாராம் என்பவருக்கு சொந்தமான மின்சார ஸ்கூட்டர் ஷோரூம் அமைந்துள்ளது. இங்கு தமிழ் புத்தாண்டை முன்னிட்டு பல்வேறு சலுகைகளுடன் மின்சாரம் ஸ்கூட்டர்கள் விற்பனை நடைபெற்று கொண்டிருந்தது. இதற்கிடையில் ஏற்கனவே மின்சார ஸ்கூட்டர்களை வாங்கி சென்றவர்கள் சர்வீஸ் செய்வதற்காக தங்களது வாகனத்தை ஷோரூமில் கொடுத்துள்ளனர். நேற்று முன்தினம் ஷோரூமில் இருக்கும் ஒரு மின்சார ஸ்கூட்டருக்கு ஊழியர்கள் சார்ஜ் போட்டனர். அப்போது எதிர்பாராதவிதமாக ஸ்கூட்டரில் இருந்த பேட்டரி வெடித்து தீப்பிடித்து எரிய ஆரம்பித்தது.
இதனை பார்த்து அதிர்ச்சி அடைந்த ஊழியர்கள் அலறியடித்துக் கொண்டு வெளியே ஓடி வந்தனர். சிறிது நேரத்தில் தீ கடை முழுவதும் வேகமாக பரவியது. இதுகுறித்து தகவல் அறிந்த தீயணைப்பு நிலைய வீரர்கள் சம்பவ இடத்துக்கு விரைந்து சென்று 2 மணி நேர போராட்டத்திற்கு பிறகு ஷோரூமில் பற்றி எரிந்த தீயை அணைத்தனர். ஆனால் இந்த தீ விபத்தில் சர்வீஸ் செய்வதற்காக வந்த 12 மின்சார ஸ்கூட்டர்கள், 5 புதிய மின்சார ஸ்கூட்டர்கள் என மொத்தம் 17 வாகனங்கள் எரிந்து நாசமானது. இதுகுறித்து வழக்குப்பதிவு செய்த காவல்துறையினர் விசாரணை மேற்கொண்டு வருகின்றனர்.