ஈரோடு ஜவுளி சந்தையானது கனி மார்க்கெட், பன்னீர்செல்வம் பார்க், திருவேங்டசாமி வீதி, ஈஸ்வரன் கோவில் வீதி ஆகிய பகுதிகள் வாரந்தோறும் திங்கள் மற்றும் செவ்வாய்க்கிழமைகளில் நடைபெற்று வருகிறது. இந்த ஜவுளி சந்தைக்கு தமிழகத்தின் பல்வேறு மாவட்டங்களில் இருந்தும் வருவார்கள். அதுமட்டுமில்லாமல் கேரளா, கர்நாடகா, ஆந்திரா உள்ளிட்ட மாநிலங்களில் இருந்தும் வியாபாரிகள் நேரடியாக வந்து ஜவுளிகளை மொத்த விலையில் வாங்கி செல்வார்கள். இந்நிலையில் ஓனம் பண்டிகை முன்னிட்டு கடந்த வாரம் ஜவுளி சந்தையில் வியாபாரம் சுமாராக நடைபெற்றது.
அதனை தொடர்ந்து இன்று கூடிய ஜவுளி சந்தையில் வெளி மாநில வியாபாரிகள் வராததால் மொத்த வியாபாரத்தில் கடும் பாதிப்பு ஏற்பட்டது. நாளை ஓணம் பண்டிகை என்பதால் இன்று கூடிய ஜவுளி சந்தையில் கேரளா வியாபாரிகள் வரவில்லை. அதனைப் போல கர்நாடகா, ஆந்திராவில் தற்போது பரவலாக மழை பெய்து வருவதால் அங்கிருந்தும் வெளி மாநில வியாபாரிகள் வரவில்லை. இதனையடுத்து கடந்த வார 48% நடந்த மொத்த வியாபாரம் இந்த வார 10% கூட நடைபெறவில்லை என்று வியாபாரிகள் வேதனை தெரிவித்தனர். அதனை போல உள்ளூர் வியாபாரிகளும் அதிக அளவில் வராததால் ஜவுளி சந்தை வெறிச்சோடி காணப்பட்டது. நேற்று நடந்த ஜவுளி சந்தையில் சில்லறை விற்பனை 30% மட்டுமே நடைபெற்றதாக வியாபாரிகள் தெரிவித்துள்ளனர்.