லாரியை திருமண மண்டபம் போல் வடிவமைத்துள்ள ஒரு வீடியோவை தன் டுவிட்டர் பக்கத்தில் பதிவிட்டு பாராட்டி இருக்கிறார் பிரபல தொழில் அதிபர் ஆனந்த் மகிந்திரா. அதில், கனரக பொருட்களை ஏற்றிச் செல்லும் கன்டெய்னர் லாரியை திருமணம் மண்டபமாக மாற்றி இருக்கின்றனர். 40 அடி நீளம் உள்ள லாரியில் மடக்கிவைத்து பயன்படுத்தக்கூடிய கூடார அமைப்புகள் இருக்கிறது. தேவைப்படும்போது அவற்றை விரித்தால் மொத்தம் 1200 சதுரடி பரப்பில் ஒரு திருமண மண்டபமாக பயன்படுத்தும் அளவுக்கு அந்த லாரி இருக்கிறதாம்.
அதில் சுமார் 200 நபர்கள் வரை அமரலாம். லாரியில் குளிர் சாதன வசதிக்காக 2 ஏ.சிகளும் பொருத்தப்பட்டு இருக்கிறது. இது தொடர்பாக ஆனந்த் மகிந்திரா கூறியிருப்பதாவது “இதை உருவாக்கிய நபரை நான் சந்திக்க விரும்புகிறேன். இந்த வடிவமைப்பு தொலை தூரப் பகுதிகளுக்கு வசதிகளை வழங்குவது மட்டுமின்றி சுற்றுச்சூழலுக்கு ஏற்ற அடிப்படையில் இருக்கிறது. மக்கள் அடர்த்தி அதிகம் உடைய நாட்டில் நிரந்தரமாக இதற்கென ஒரு இடம்தேவையில்லை. இது சிறந்த படைப்பாற்றல் மிக்க சிந்தனைமிக்க ஒன்றாகும்” என்று அவர் பதிவிட்டுள்ளார்.