புதுச்சேரியில் டிப்பர் லாரியை திருடிச் சென்ற 2 பேர் அரியலூர் அருகே போலீசாரால் கைது செய்யப்பட்டுள்ளனர்.
புதுச்சேரி மாநிலம் பாக்குமூட்டைபட்டு மகாத்மா நகரைச் சேர்ந்தவர் ஆறுமுகம். மணல் ஜல்லி வியாபாரம் செய்து வருகிறார். இவருக்கு சொந்தமான லாரி ஒன்று கடந்த 6ம் தேதி இரவு காணாமல் போனது. இதன் மதிப்பு சுமார் 10 லட்சம் ஆகும். லாரி திருட்டு போனதால் அதிர்ச்சி அடைந்த ஆறுமுகம் போலீசில் புகார் அளித்துள்ளார். புகாரின் பேரில் விசாரணை செய்த சப்-இன்ஸ்பெக்டர் திருமுருகன் மற்றும் போலீசார் வழக்குப்பதிவு செய்து லாரியில் பொருத்தப்பட்டிருந்த ஜிபிஎஸ் கருவி மூலம் விசாரணை நடத்தி வந்தனர்.
அப்போது விழுப்புரம் -திருச்சி நெடுஞ்சாலையில் லாரி இருப்பது தெரியவந்தது. இதனை தொடர்ந்து அரியலூர் அருகே சென்று கொண்டிருந்த லாரியை போலீசார் மடக்கி பிடித்தனர். அதிலிருந்த 2 பேரை கைது செய்தனர். விசாரணையில் திருநெல்வேலி மாவட்டம் சங்கரன் நகரை சேர்ந்த கண்ணாடி வேலு என்ற சிங்காரவேலு மற்றும் திருவனந்தபுரத்தை சேர்ந்த மன்மோகன் இருவரும் சேர்ந்து லாரியை திருடிச்சென்று தமிழகத்தில் விற்பனை செய்ய திட்டமிட்டுள்ளது தெரியவந்தது. 2 பேரையும் போலீசார் கைது செய்து கோர்ட்டில் ஆஜர்படுத்தினர்.