கிருஷ்ணகிரி மாவட்டத்தில் உள்ள உடையாண்டஅள்ளி பகுதியில் பெருமாள் என்பவர் வசித்து வந்துள்ளார். இவர் தினமும் மொபட்டில் ராயக்கோட்டை மற்றும் அதனை சுற்றியுள்ள கிராமங்களுக்கு பாத்திரங்கள் மற்றும் பிளாஸ்டிக் குடங்களை விற்பனை செய்து வந்துள்ளார். இந்நிலையில் ராயக்கோட்டை-எச்சம்பட்டி சாலையில் பெருமாள் நின்று கொண்டிருந்தபோது ஒரு வாலிபர் அவரை கத்தியால் குத்தி கொலை செய்துவிட்டு அங்கிருந்து தப்பி சென்றார். இதுகுறித்து அறிந்த போலீசார் சம்பவ இடத்திற்கு சென்று பெருமாளின் உடலை மீட்டு அரசு மருத்துவமனைக்கு பிரேத பரிசோதனைக்காக அனுப்பி வைத்தனர். இதுகுறித்து வழக்கு பதிவு செய்த போலீசார் விசாரணை நடத்தினர்.
பெருமாளுக்கு மல்லிகா என்ற மனைவியும், இரண்டு மகள்களும், ஒரு மகனும் இருக்கின்றனர். இந்நிலையில் பெருமாளுக்கும் அவரது தம்பி மகனான சக்திவேல் என்பவருக்கும் ஏற்கனவே பிரச்சனை இருந்துள்ளது. இருவரின் வீடுகளும் அருகருகே இருக்கிறது. தினமும் இரவு நேரத்தில் சக்திவேல் ஹோம் தியேட்டரில் அதிகளவு சத்தம் வைத்து பாட்டு கேட்பதுடன் பிறருக்கு இடையூறு செய்து வந்தார். இதனை பெருமாள் கண்டித்ததால் இருவருக்கும் இடையே தகராறு ஏற்பட்டது. அதன் பிறகு சக்திவேல் தனது பெரியப்பாவை கத்தியால் குத்தி கொலை செய்தது தெரியவந்தது. இந்த சம்பவம் அப்பகுதியில் பரபரப்பை ஏற்படுத்தியுள்ளது.