சட்டப்பேரவையில் நேற்று வீட்டுவசதி துறை மானியக் கோரிக்கை மீதான விவாதத்திற்கு பதிலளித்து பேசிய தா.மோ.அன்பரசன் பல அறிவிப்புகளை வெளியிட்டார். அதில் பொருளாதாரத்தில் நலிவுற்ற குடும்பங்களுக்கு தாமாக வீடு கட்டிக்கொள்ள 2.10 லட்சம் மானியம் வழங்கப்படும். இந்த திட்டத்தின் கீழ் சென்னை, இதர மாநகரங்கள், நகரங்கள் மற்றும் பேரூராட்சிகளில் தனி வீடு கட்டும் பணிகள் பல்வேறு நிலைகளில் முன்னேற்றத்தில் உள்ளது.
தமிழ்நாடு நகர்ப்புற மேம்பாட்டு வாரியத்தால் நகர்ப்புற ஏழை மக்களுக்காக அடுக்குமாடி குடியிருப்புகள் கட்டப்பட்டு, தகுதியான நபர்களுக்கு ஒதுக்கீடு செய்யப்பட்டு வருவதாக தெரிவித்தார். பொருளாதாரத்தில் பின்தங்கிய ஏழை குடும்பங்களுக்கு 25 ஆயிரம் அடுக்குமாடி குடியிருப்புகள் கட்டித் தரப்படும். மக்கள் வாழ்வதற்கு தகுதியற்ற 7500 அடுக்குமாடி குடியிருப்புகள் 1,700 கோடியில் மறுகட்டுமானம் செய்யப்படும் எனவும் அவர் தெரிவித்துள்ளார்.