தமிழ் திரைப்படங்களில் ஒரு காலகட்டத்தில் கலக்கி வந்த நடிகர் ராமராஜன். அதிமுகவின் தலைமை கழக பேச்சாளராகவும் பொறுப்பு வகித்து வந்தார். முதலில் உதவி இயக்குனராகவும் மற்றும் இயக்குனராகவும் இருந்து பிறகு முழு நேர நடிகரானார். இவர் நடித்த கரகாட்டகாரன் திரைப்படம் ஒரு வருடம் ஓடி சாதனை படைத்தது. இவர் நடித்த எங்க ஊரு பாட்டுக்காரன், தங்கமான ராசா உள்ளிட்ட பல திரைப்படங்களில் நடித்து புகழ் பெற்றவர் ஆவார்.
இந்த நிலையில் நடிகர் ராமராஜன் நீண்ட இடைவெளிக்கு பின்னர் ‘சாமானியன்’ என்ற படத்தில் நாயகனாக நடித்துள்ளார். இந்நிலையில், இப்படம் குறித்து பேசிய அவர், “இந்த படத்தில் கதையும், திரைக்கதையும் தான் நாயகன். இன்னொரு நாயகன் ‘சாமானியன்’ என்ற தலைப்பு. 100 கோடி ரூபாய் கொடுத்தாலும் தாறுமாறான படங்களில் நடிக்க மாட்டேன். பணத்துக்காக என் கொள்கையை மாற்ற மாட்டேன். இந்த படத்தில் எனக்கு ஜோடி கிடையாது. இந்த கதையில் நடிப்பதை பெருமையாக கருதுகிறேன்” என கூறியுள்ளார்.