இந்தியாவில் 24 மணிநேரத்தில் 55 ஆயிரத்துக்கும் மேற்பட்டோர் கொரோனாவால் பாதிக்கப்பட்டுள்ளனர்.
உலக அளவில் தீவிரமாக கொரோனா வைரஸ் பரவும் நாடுகள் பட்டியலில் இந்தியா தொடர்ந்து முன்னிலையில் இருந்து வருகிறது. சென்ற சில வாரங்களாக தினமும் சரசாரியாக 50 ஆயிரத்துக்கும் அதிகமானோருக்கு புதிதாக தொற்று உறுதி செய்யப்பட்டு வரும் நிலையில் குணமடைந்தவர்களின் எண்ணிக்கையும் தொடர்ந்து அதிகரித்து வருவது ஆறுதல் அளிப்பதாக உள்ளது.
இந்த நிலையில், இன்று காலை மத்திய சுகாதாரத்துறை வெளியிட்டிருக்கும் தகவலின் அடிப்படையில் இந்தியாவில் கொரோனா பாதிப்பு 27 லட்சத்தை தாண்டி இருக்கிறது. மொத்தம் 27,02,743 பேர் கொரோனாவால் பாதிக்கப்பட்டுள்ள நிலையில். சென்ற 24 மணி நேரத்தில் 55,079 பேருக்கு கொரோனா தொற்று உறுதி செய்யப்பட்டு 876 பேர் உயிரிழந்துள்ளனர். இதன்மூலம் கொரோனா வைரசால் உயிரிழந்தோர் எண்ணிக்கை 51,797 ஆக உயர்ந்துள்ளது.
இதுவரை 19,77,780 பேர் கொரோனா பாதிப்பில் இருந்து குணமடைந்துள்ள நிலையில் நாடு முழுவதிலும் உள்ள பல்வேறு மருத்துவமனைகளில் 6,73,166 பேர் சிகிச்சை பெற்றுவருகின்றனர். உயிரிழப்பு 1.9 சதவீதமாகவும், குணமடைந்தோர் விகிதம் 73.2 சதவீதமாகவும் இருப்பது என்பது குறிப்பிடத்தக்கது.