சிறுமியை கட்டாயப்படுத்தி திருமணம் செய்து கொண்ட ஆட்டோ டிரைவரை போலீசார் போக்சோ சட்டத்தில் கைது செய்துள்ளனர்.
தேனி மாவட்டம் பொடியை அடுத்துள்ள துரைசாமிபுரம் மேலத்தெருவில் வசித்து வரும் தங்கபரமானந்தம்(25) என்பவர் ஆட்டோ ஓட்டி வருகிறார். இவர் கடந்த ஆண்டு மே மாதம் 16 வயது சிறுமியை பெற்றோர் சம்மதத்துடன் திருமணம் செய்து கொண்டுள்ளார். இந்நிலையில் அந்த சிறுமிக்கு நேற்று முன்தினம் தேனி அரசு மருத்துவமனையில் ஆண் குழந்தை பிறந்துள்ளது. இதனையடுத்து சிறுமியின் வயதை அறிந்த மருத்துவர்கள் உடனடியாக போடி அனைத்து மகளிர் காவல்நிலையத்தில் புகார் அளித்தனர்.
அந்த புகாரின் அடிப்படையில் காவல்துறையினர் மருத்துவமனைக்கு சென்று சிறுமியிடம் விசாரணை நடத்தியுள்ளனர். அப்போது தன்னை கட்டாயப்படுத்தி திருமணம் செய்து வைத்ததாக சிறுமி தெரிவித்துள்ளார். இதுகுறித்து வழக்குபதிவு செய்த போலீசார் சிறுமியை கட்டாயப்படுத்தி திருமணம் செய்து கொண்ட தங்கபரமானந்தத்தை போக்சோ சட்டத்தில் கைது செய்தனர். மேலும் சிறுமியின் பெற்றோர் மீதும் வழக்குபதிவு செய்து விசாரித்து வருகின்றனர்.