நான்கு வீடுகள் மீது பொக்லைன் எந்திரம் மோதிய சம்பவம் பரபரப்பை ஏற்படுத்தியுள்ளது.
சென்னை மாநகராட்சி மூலம் கொருக்குப்பேட்டை அம்பேத்கர் 5-வது தெருவில் பக்கிங்காம் கால்வாய் தூர்வாரும் பணி தீவிரமாக நடைபெற்று வருகிறது. நேற்று முன்தினம் கால்வாயில் இருக்கும் ஆகாய தாமரைகளை பொக்லைன் எந்திரம் மூலம் தூர்வாரியுள்ளனர். இந்நிலையில் பொக்லைன் கால்வாய் அருகே இருந்த 4 வீடுகள் மீது எதிர்பாராதவிதமாக மோதியதால் 2 வீடுகளின் சுவர் இடிந்து மேற்கூறை சரிந்து விழுந்தது. மேலும் 2 வீடுகள் விரிசல் ஏற்பட்டு இடிந்து விழும் நிலையில் இருக்கிறது.
இதனால் கோபமடைந்த பொதுமக்கள் பொக்லைன் எந்திர ஓட்டுநரை முற்றுகையிட்டு வாக்குவாதத்தில் ஈடுபட்டனர். இதுகுறித்து அறிந்த ஆர்.கே நகர் தொகுதி எம்.எல்.ஏ எபினேசர், 47-வது வார்டு கவுன்சிலர் மணிமேகலை ஆகியோர் சம்பவ இடத்திற்கு சென்று பேச்சுவார்த்தை நடத்தி பாதிக்கப்பட்ட நான்கு குடும்பத்தினரை அருகில் இருக்கும் பள்ளியில் தங்க வைத்துள்ளனர். அவர்களுக்கு பருப்பு, வேட்டி, சேலை, அரிசி வழங்கப்பட்டுள்ளது. இதனை அடுத்து பாதிக்கப்பட்ட வீடுகளுக்கு நிவாரண தொகை பெற்று தருவதாகவும் அதிகாரிகள் உறுதி அளித்தனர்.