அரசு பேருந்தும், லாரியும் நேருக்கு நேர் மோதிய விபத்தில் 5 பேர் காயமடைந்த சம்பவம் பரபரப்பை ஏற்படுத்தியுள்ளது.
திண்டுக்கல் மாவட்டத்தில் உள்ள பழனியில் இருந்து சரக்குகளை ஏற்றிக்கொண்டு லாரி ஒன்று கோவை நோக்கி சென்று கொண்டிருந்தது. இந்த லாரியை கேரள மாநிலத்தைச் சேர்ந்த சந்திரன் என்பவர் ஒட்டி சென்றுள்ளார். இந்நிலையில் தாழையூத்து என்ற இடத்தில் சென்று கொண்டிருந்த போது பழனி நோக்கி வேகமாக வந்த அரசு பேருந்து லாரி மீது பயங்கரமாக மோதியது. இந்த விபத்தில் லாரியின் முன்பகுதி சுக்குநூறாக நொறுங்கியது.
மேலும் இந்த விபத்தில் சந்திரனும் பேருந்தில் பயணம் செய்த 4 பயணிகளும் காயமடைந்தனர். இதுகுறித்து அறிந்த போலீசார் சம்பவ இடத்திற்கு விரைந்து சென்று காயமடைந்த 5 பேரையும் மீட்டு மருத்துவமனைக்கு சிகிச்சைக்காக அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இதுகுறித்து வழக்கு பதிந்த போலீசார் விசாரணை மேற்கொண்டு வருகின்றனர்.