5 இருசக்கர வாகனங்களை திருடிய டிரைவரை காவல்துறையினர் கைது செய்துள்ளனர்.
திருவண்ணாமலை மாவட்டத்தில் உள்ள போளூர் காவல்துறையினர் தீவிர ரோந்து பணியில் ஈடுபட்டுள்ளனர். அப்போது சந்தேகத்திற்கு இடமான வகையில் மோட்டார் சைக்கிளில் வந்த நபரை காவல்துறையினர் பிடித்து விசாரணை நடத்தினர். அந்த விசாரணையில் அவர் முன்னுக்குப் பின் முரணாக பதில் அளித்துள்ளார். இதனை தொடர்ந்து காவல்துறையினர் அவரிடம் விசாரணை நடத்தியதில் அவர் காளப்புதூர் பகுதியில் வசிக்கும் தமிழ்செல்வன் என்பது தெரியவந்துள்ளது.
மேலும் அவர் பால்வண்டி டிரைவராக வேலை பார்த்து வருகிறார். இந்நிலையில் தமிழ்செல்வன் போளூர் பகுதியில் 2 மோட்டார் சைக்கிள்களையும், திருவண்ணாமலை பகுதியில் ஒரு மோட்டார் சைக்கிளையும், காஞ்சிபுரம் பகுதியில் ஒரு மோட்டார் சைக்கிளையும், சென்னை அம்பத்தூர் பகுதியில் ஒரு மோட்டார் சைக்கிள் என மொத்தம் 5 இருசக்கர வாகனங்களை திருடி இருப்பது தெரியவந்துள்ளது. மேலும் இது குறித்து வழக்கு பதிவு செய்த காவல்துறையினர் தமிழ்செல்வனை கைது செய்ததோடு அவரிடம் இருந்த மோட்டார் சைக்கிள்களையும் பறிமுதல் செய்தனர்.