கட்டுப்பாட்டை இழந்த கார் 50 அடி பள்ளத்தில் பாய்ந்த விபத்தில் 2 பேர் படுகாயமடைந்த சம்பவம் பரபரப்பை ஏற்படுத்தியுள்ளது.
வேலூர் மாவட்டத்தில் உள்ள பாரதி நகரில் நூர்முகமது(43) என்பவர் வசித்து வருகிறார். இவர் தனது குடும்பத்தினருடன் திண்டுக்கல் மாவட்டத்திலுள்ள கொடைக்கானலுக்கு சுற்றுலா சென்றுள்ளார். இந்நிலையில் நூர்முகமது நேற்று காலை தனது குடும்பத்தினருடன் காரில் ஊருக்கு சென்று கொண்டிருந்தார். இந்த காரை முனியன் என்பவர் ஓட்டிச் சென்றுள்ளார். இவர்கள் கொடைக்கானல்- வத்தலக்குண்டு மலைப்பாதையில் செண்பகனூர் அருகே சென்று கொண்டிருந்த போது ஓட்டுநரின் கட்டுப்பாட்டை இழந்த கார் தாறுமாறாக ஓடி தடுப்பு சுவரை இடித்து கொண்டு 50 அடி பள்ளத்தில் பாய்ந்துவிட்டது.
இந்த விபத்தில் நூர்முகமது, முனியன் ஆகிய 2 பேரும் படுகாயமடைந்து உயிருக்கு போராடி கொண்டிருந்தனர். இதில் நூர்முகமதுவின் மனைவி மற்றும் இரண்டு குழந்தைகள் அதிர்ஷ்டவசமாக காயமின்றி உயிர் தப்பினர். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று படுகாயமடைந்த 2 பேரையும் மீட்டு கொடைக்கானல் அரசு மருத்துவமனையில் சிகிச்சைக்காக அனுமதித்துள்ளனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இது குறித்து வழக்குப்பதிவு செய்த காவல்துறையினர் விசாரணை நடத்தி வருகின்றனர்.