தமிழக பள்ளி மாணவர்களுக்கு சென்ற 2 வருடங்களாக கொரோனா காரணமாக நேரடி வகுப்புகள் நடத்தப்படவில்லை. இதனால் அப்போது மாணவர்களுக்கு பொதுத் தேர்வு நடத்துவதில் சிரமம் ஏற்பட்டது. இதையடுத்து பொதுத் தேர்வுகள் நடத்தப்படாமல் மாணவர்களுக்கு பழைய மதிப்பெண் அடிப்படையில் மதிப்பெண் வழங்கப்பட்டது. இந்த நிலையில் இந்த ஆண்டு கொரோனா பரவல் குறைந்ததை அடுத்து பள்ளிகளில் நேரடி வகுப்புகள் துவங்கப்பட்டது.
அதுமட்டுமல்லாமல் பொதுத் தேர்வு கட்டாயம் நடத்தப்படும் என்று பள்ளிக்கல்வித்துறை தேர்வு தேதி தொடர்பான அறிவிப்பை வெளியிட்டது. அந்த வகையில் 12ம் வகுப்பு பொதுத் தேர்வு மே 5 ஆம் தேதி துவங்கி மே 28 ஆம் தேதி முடிந்துள்ளது. பின் 10-ம் வகுப்பு பொதுத் தேர்வு மே 6-30ஆம் தேதி வரையும், 11-ம் வகுப்பு பொதுத் தேர்வு மே 9 ஆம் தேதி தொடங்கி நேற்றுடனும் முடிந்துள்ளது. இதனால் மாணவர்கள் தற்போது கோடை விடுமுறையில் இருக்கின்றனர்.
இந்த நிலையில் 10 மற்றும் 12-ஆம் வகுப்பு மாணவர்களின் விடைத்தாள்கள் இன்றுமுதல் திருத்த உள்ளதாக தெரிவிக்கப்பட்டுள்ளது. நேற்று நடந்து முடிந்த 11 ஆம் வகுப்பு பொதுத் தேர்வு விடைத்தாள் வரும் ஜூன் 9ஆம் தேதி முதல் திருத்தப்பட உள்ளதாக தெரிவிக்கப்பட்டுள்ளது. அதுமட்டுமல்லாமல் 10-ம் வகுப்பு மாணவர்களுக்கு தேர்வு முடிவுகள் ஜூன் 17-ம் தேதியும், 11-ம் வகுப்பு மாணவர்களுக்கு ஜூலை 7-ம் தேதியும், 12-ஆம் வகுப்பு மாணவர்களுக்கு ஜூன் 23-ம் தேதியும் வெளியாகும் என்று தெரிவிக்கப்பட்டுள்ளது.