தென்மேற்கு வங்கக்கடல் பகுதிகளில் நிலவும் காற்றழுத்த தாழ்வு மண்டலம், நாகையில் இருந்து சுமார் 470 கி.மீ. கிழக்கே நிலை கொண்டுள்ளது. இது மேற்கு-தென்மேற்கு திசையில் நகர்ந்து, இன்று இலங்கை கடற்கரை அருகில் நிலவக் கூடும். அதன் பிறகு மேற்கு-தென்மேற்கு திசையில் நகர்ந்து 26ஆம் தேதி காலையில் இலங்கை வழியாக குமரிக்கடல் மற்றும் அதனை ஒட்டிய பகுதிகளை நோக்கி நகரக்கூடும்.
இதன் காரணமாக, தமிழகத்தில் 8 மாவட்டங்களுக்கு இன்று மஞ்சள் அலர்ட் விடுக்கப்பட்டுள்ளது. அதன்படி, தூத்துக்குடி, ராமநாதபுரம், சிவகங்கை, நாகை, புதுக்கோட்டை, மயிலாடுதுறை, தஞ்சை, திருவாரூர் மாவட்டங்களில் கனமழை பெய்யக்கூடும். மேலும், நாளை குமரி, நெல்லை, ராமநாதபுரம், தூத்துக்குடி, தேனி, விருதுநகர், தென்காசி, புதுக்கோட்டை, தஞ்சை, நாகை, மயிலாடுதுறை, திருவாரூர், சிவகங்கை மாவட்டங்களுக்கு மஞ்சள் அலர்ட் விடுக்கப்பட்டுள்ளது.