ஆரணியில் தனியார் பள்ளி பேருந்து ஒன்றில் 8 அடி பாம்பு இருந்தது அப்பகுதியில் அதிர்ச்சியை ஏற்படுத்தியுள்ளது.
ஆரணியை அடுத்த கண்ணமங்கலம் பகுதி அருகே துலீப் இண்டர்நேஷனல் பள்ளி செயல்பட்டு வருகிறது. இன்று காலை வழக்கம்போல் சுற்றுவட்டாரப் பகுதிகளில் இருந்து மாணவர்களை பள்ளி பேருந்து ஏற்றிக் கொண்டு வந்த நிலையில், ஓட்டுனர் இருக்கை அருகில் இருந்து பாம்பு ஒன்று வெளியில் வந்துள்ளது.
அதனைக் கண்ட மாணவர்கள் பயத்தில் அலறினர். அதன்பின் உடனடியாக பேருந்து நிறுத்தப்பட்டு மாணவர்கள் அவசர அவசரமாக இறக்கப்பட்டனர். இதையடுத்து பாம்பு பிடிப்பவர்கள் வரவழைக்கப்பட்டு பேருந்துக்குள் இருந்து சுமார் எட்டடி சாரைப் பாம்பை பிடித்தனர். இந்நிலையில் ஆரணி துலீப் இன்டர்நேஷனல் பள்ளி வளாகத்தில் புறா,முயல்,வாத்து உள்ளிட்டவை வளர்க்கப்பட்டு வருகின்றன. எனவே அவற்றைப் பிடிக்க வந்த பாம்பு பேருந்தின் உள்ளே புகுந்து பதுங்கி இருக்கலாம் என்று கூறப்படுகிறது.