கேரட் லோடு ஏற்றி சென்ற லாரி 80 அடி பள்ளத்தில் கவிழ்ந்து விபத்துக்குள்ளான சம்பவம் பரபரப்பை ஏற்படுத்தியுள்ளது.
நீலகிரி மாவட்டத்தில் இத்தலார் கிராமத்தில் இருந்து மேட்டுப்பாளையம் நோக்கி கேரட் மூட்டைகளை ஏற்றிக்கொண்டு லாரி ஒன்று புறப்பட்டுள்ளது. இந்த லாரியை கவின் என்பவர் ஓட்டிச் சென்றுள்ளார். மேலும் அவருடன் வேலுச்சாமி, சூரியபிரகாஷ், சசி போன்றோர் இருந்துள்ளனர். இந்நிலையில் சேலாஷ் பகுதியில் இருக்கும் ஒரு வளைவில் திரும்பும் போது கட்டுப்பாட்டை இழந்த லாரியானது சாலையோரம் உள்ள 80 அடி பள்ளத்தில் கவிழ்ந்து விட்டது.
இந்த விபத்தில் 3 பேர் படுகாயமடைந்த நிலையில், ஒருவர் லேசான காயத்துடன் உயிர் தப்பிவிட்டார். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று படுகாயம் அடைந்தவர்களை மீட்டு அரசு மருத்துவமனையில் சிகிச்சைக்காக அனுமதித்துள்ளனர். அதன் பின் கிரேன் மூலம் லாரியை மீட்கும் பணியில் காவல்துறையினர் தீவிரமாக ஈடுபட்டு வருகின்றனர்.