தமிழகத்தில் கொரோனா அச்சுறுத்தல் காரணமாக கடந்த ஒன்றரை வருடமாக பள்ளி மற்றும் கல்லூரிகள் அனைத்தும் திறக்கப்படாமல் இருந்தது.அதன்பிறகு கொரோனா பாதிப்பு கணிசமாக குறைந்து வந்த நிலையில் கடந்த செப்டம்பர் மாதம் 1ம் தேதி முதல் பள்ளி மற்றும் கல்லூரிகள் அனைத்தும் திறக்கப்பட்டு நேரடி வகுப்புகள் நடந்து கொண்டிருக்கிறது. இதனையடுத்து வருகின்ற நவம்பர் 1 முதல் அனைத்து வகுப்பு மாணவர்களுக்கும் நேரடி வகுப்புகள் தொடங்கப்படும் என்று தமிழக அரசு அறிவித்துள்ளது.
இந்நிலையில் திருப்பூர் மாவட்டத்தில் அனைத்து அரசு பள்ளிகளிலும் 9,10 ஆம் வகுப்பு பயிலும் மாணவர்களின் பெற்றோர், ஆசிரியர் கழகக் கூட்டம் நடத்த உத்தரவிட்டுள்ளது. மாணவர்களின் செயல்களை ஆராயும் வகையில் பெற்றோர்களை பள்ளிக்கு வரவழைத்து ஆலோசனை நடத்துவதற்கு முதன்மை கல்வி அலுவலர் உத்தரவிட்டுள்ளார். மாவட்டத்தில் உள்ள அனைத்து அரசு உயர்நிலை மற்றும் மேல்நிலைப் பள்ளிகளில் பயிலும் ஒன்பதாம் வகுப்பு மாணவர்களின் பெற்றோருக்கு வரும் 21-ம் தேதியும்,பத்தாம் வகுப்பு மாணவர்களின் பெற்றோருக்கு வருகின்ற 22ம் தேதியும் பெற்றோர் ஆசிரியர் கழகக் கூட்டம் நடத்தப்பட உள்ளது. மாவட்ட கல்வி அலுவலர்கள், ஆசிரியர் பயிற்றுனர்கள் மற்றும் மாவட்ட உதவித் திட்ட ஒருங்கிணைப்பாளர் ஆகியோர் பள்ளிகளை ஆய்வு செய்வது கட்டாயம் என உத்தரவிடப்பட்டுள்ளது.