வெளியூர் செல்ல அனுமதி கோரும் விண்ணப்பங்களுக்கு 1 மணி நேரத்தில் அனுமதி வழங்கப்படுவதாக சென்னை உயர்நீதிமன்றத்தில் தமிழக அரசு விளக்கம் அளித்துள்ளது. சந்தேக தன்மை உடைய விண்ணப்பங்கள் மட்டுமே நிலுவையில் வைக்கப்படுகிறது என்றும், கட்டுப்பாட்டு அறை 24 மணி நேரமும் செயல்பட வழிவகை செய்யப்பட்டுள்ளது என நீதிமன்றத்தில் அரசு விளக்கம் அளித்துள்ளது.
வழக்கு விவரம்:
நாடு முழுவதும் கொரோனா பரவல் காரணமாக ஊரடங்கு பிறப்பிக்கப்பட்டுள்ளது. இந்த நிலையில் தமிழகத்தில் திருமணம், மருத்துவம் மற்றும் துக்க நிகழ்ச்சிகள் போன்ற காரணகளுக்காக வெளியூர் செல்பவர்களுக்கு அனுமதி சீட்டுகள் வழங்கப்பட்டு வருகின்றன. இந்த இ-பாஸ்கள் மின்னணு முறையில் வழங்கப்பட்டு வருகிறது. இணையத்தளம் மூலம் விண்ணப்பிக்கப்படும் போது, மிக தாமதமாக வழங்கப்படுவதாக குற்றசாட்டு எழுந்தது.
இது தொடர்பாக, திருச்செந்தூரை சேர்ந்த ராம் குமார் என்பவர் சென்னை உயர்நீதிமன்றத்தில் வழக்கு ஒன்றை தொடர்ந்தார். அந்த மனுவில் திருமணம் உள்ளிட்ட விழாக்கள் ஏற்கனவே தீர்மானிக்கப்பட்டு நடத்தப்படுவதால், முக்கூட்டியே அதற்கு இ-பாஸ் வழங்கக்கோரி விண்ணப்பிக்க முடியும்.
ஆனால் எதிர்பாராமல் நிகழக்கூடிய மரணங்கள், உடல் நலக்குறைவுகளுக்கு அனுமதி சீட்டு கேட்டு விண்ணப்பிக்கும் போது, அவை தாமதமாக வழங்கப்படுகின்றன என குறிப்பிட்டுள்ளார். மேலும், இ-பாஸ் வழங்கக்கூடிய கட்டுப்பாட்டு அறைகள் காலை 8 மணி முதல் இரவு 8 மணி வரை மட்டுமே செயல்படுவதாகவும், இதனால் அவசர முன்பதிவுக்காக ஒரு நாள் வரை காத்திருக்க வேண்டியுள்ளது என மனுவில் குறிப்பிட்டிருந்தார்.
எனவே, மருத்துவம் மற்றும் மரணம் உள்ளிட்ட காரணங்களுக்காக அனுமதி கேட்டு அளிக்கப்படும் விண்ணப்பங்களை 1 மணி நேரத்தில் முடிவெடுத்து சம்மந்தப்பட்டவர்களுக்கு தெரிவிக்க வேண்டும் என கோரிக்கை வைக்கப்பட்டது. 24 மணி நேரமும் அனுமதி சீட்டு வழங்கும் பணி நடைபெற வேண்டும் எனவும் மனுவில் குறிப்பிட்டுள்ளார்.
தமிழக அரசு விளக்கம்:
இந்த வழக்கு கடந்த வெள்ளிக்கிழமை நீதிபதிகள் வினித் கோத்தாரி மற்றும் புஷ்பா சத்தியநாராயணா அடங்கிய அமர்வு முன்பு விசாரணைக்கு வந்தது. இந்த வழக்கு தொடர்பாக 11ம் தேதிக்குள் தமிழக அரசு பதிலளிக்க வேண்டும் என கூறி வழக்கை ஒத்திவைத்தனர். அதன்படி, இன்று இந்த வழக்கு விசாரணைக்கு வந்த போது, காரணமாக வெளியூர் செல்ல அனுமதி கோரும் விண்ணப்பங்களுக்கு 1 மணி நேரத்தில் அனுமதி வழங்கப்படுவதாக தமிழக அரசு விளக்கம் அளித்துள்ளது.
நேற்று வரை 3,61,433 விண்ணப்பங்களில் 3,48,210 விண்ணப்பங்களுக்கு அனுமதி வழங்கப்பட்டுள்ளதாக தமிழக அரசு தரப்பில் தெரிவிக்கப்பட்டுள்ளது. அரசு தரப்பின் விரிவான விளக்கத்தை ஏற்றுக்கொண்ட உயநீதிமன்ற நீதிபதிகள் வழக்கை முடித்து வைத்து உத்தரவிட்டனர்.