சிறப்பு ரயில்களுக்கான முன்பதிவு தொடங்கிய சில நிமிடங்களிலேயே இணையதளம் முடங்கியதால் இன்று மாலை 6 மணிக்கு தொடங்கும் என ஐஆர்சிடிசி அறிவித்துள்ளது.
இந்தியாவில் கொரோனாவால் பாதிக்கப்பட்டவர்கள் எண்ணிக்கையானது நாளுக்கு நாள் அதிகரித்து வருகிறது. நாடு முழுவதும் கொரோனா பாதிப்பு எண்ணிக்கையானது 67,152 ஆக அதிகரித்துள்ளது. கொரோனா அச்சுறுத்தல் காரணமாக நாடு முழுவதும் மே 17ம் தேதி வரை ஊரடங்கு உத்தரவு 3ம் காட்டமாக நீட்டிக்கப்பட்டுள்ளது. ஊரடங்கு பிறப்பிக்கப்பட்டு 48வது நாளாக அமலில் உள்ளது. இதனிடையே நாடு முழுவதும் வரும் 12ம் தேதி முதல் பயணிகள் ரயில் சேவை துவங்கப்படும் என மத்திய ரயில்வே அமைச்சகம் அறிவிப்பு வெளியிட்டது. இதற்கான முன்பதிவு இன்று மாலை 4 மணிக்கு தொடங்கும் என்று தெரிவித்திருந்தது.
புதுடெல்லியில் இருந்து, மும்பை, பெங்களூரு, சென்னை, திருவனந்தபுரம் செகந்திராபாத், பெங்களூர், அகமதாபாத், ஜூம்மு தாவி, மும்பை, திப்ரூகர், அகர்தலா, ஹவுரா, பாட்னா, பிளாஸ்பூர், ராஞ்சி, புவனேஸ்வர்உள்ளிட்ட 15 நகரங்களை இணைக்கும் விதமாக இரு மார்க்கங்களிலும் 30 ரயில்கள் இயக்கப்படும் என ரயில்வே அமைச்சகம் தெரிவித்திருந்த நிலையில் அதற்கான முன்பதிவு தொடங்கியது. ஆனால் முன்பதிவு தொடங்கிய சில நிமிடங்களிலேயே ஐஆர்சிடிசி இணையதளம் முடங்கியுள்ளது.
இதையடுத்து சிறப்பு ரயில்களின் விவரங்கள் இணையத்தில் பதிவேற்றம் செய்யப்பட்டு வருவதால் தாமதம் என ரயில்வே விளக்கம் அளித்துள்ளது. இதனால் ஏற்கனவே மாலை 4 மணிக்கு தொடங்கும் என அறிவிக்கப்பட்ட நிலையில் தற்போது நேர மாற்றம் செய்யப்பட்டு இன்று மாலை 6 மணிக்கு தொடங்கும் என அறிவித்துள்ளது. மேலும் ArogyaSetuApp பயன்படுத்த வேண்டும் என பயணிகளுக்கு அறிவுறுத்தியுள்ளது. காத்திருப்பு அல்லது ஆர்ஏசி டிக்கெட் முன்பதிவு செய்யப்பட மாட்டாது என கூறப்பட்டுள்ளது. போர்வைகள், கம்பளி ஆகியவை ரயிலில் வழங்கப்படாது, பயணிகள் கொண்டு வர வேண்டும் என ரயில்வே தெரிவித்துள்ளது.