ராசிபுரம் அருகே விபத்தில் இளைஞர் ஒருவர் உயிரிழந்த சம்பவம் குறித்து காவல் துறையினர் விசாரணை மேற்கொண்டு வருகின்றனர்.
நாமக்கல் மாவட்டம் ராசிபுரம் அருகே சேலம் to நாமக்கல் தேசிய நெடுஞ்சாலையிலுள்ள ஆயா கோவில் பிரிவு ரோடு அருகே நேற்று காலை இளைஞர் ஒருவர் சாலையை கடந்து செல்ல முயன்றபோது சேலத்திலருந்து நாமக்கல் நோக்கி வேகமாக சென்ற கார் திடீரென அவர் மீது மோதியது. இந்த விபத்தில் இடது கை, இடது கால் மற்றும் தலையில் பலத்த அடிபட்ட அந்த இளைஞர் சம்பவ இடத்திலேயே பரிதாபமாக பலியானார்.
இந்த விபத்து குறித்து ராசிபுரம் காவல்துறையினர் வழக்குப்பதிவு செய்து, உயிரிழந்த நபரின் உடலை மீட்டு ராசிபுரம் அரசு மருத்துவமனைக்கு உடற்கூறாய்வுக்காக அனுப்பி வைத்தனர். விபத்தில் இறந்து போன இளைஞருக்கு 25 வயது இருக்கும்.. ஆனால் அவர் யார்? எந்த ஊரைச் சேர்ந்தவர்? என்ற விவரம் குறித்த தகவல் தெரியவில்லை.
இது குறித்து ராசிபுரம் காவல்துறையினர் தொடர்ந்து விசாரணை மேற்கொண்டு வருகின்றனர். விபத்தில் பலியானவரை பற்றி தகவல் தெரிந்தவர்கள் ராசிபுரம் காவல் நிலையத்திற்கு தகவல் தெரிவிக்கும்படி காவல்துறையினர் கேட்டுக்கொண்டுள்ளனர்.