கத்தியால் குத்தப்பட்ட பெண்ணின் உடலில் 30 மணி நேரம் சிக்கியிருந்த கத்தியை அகற்றி கோவை அரசு மருத்துவமனை மருத்துவர்கள் சாதனை படைத்துள்ளனர்.
கிருஷ்ணகிரி மாவட்டம் ஓசூர் கொட்ட ராஜா நகரில் வசித்து வருபவர் பால்ராஜ். இவருக்கு மல்லிகா(40) என்ற மனைவி உள்ளார்.. இந்நிலையில் கடந்த மாதம் 25ஆம் தேதி குடும்ப பிரச்சனை காரணமாக மல்லிகாவை ஒரு நபர் கத்தியால் ஓங்கி குத்தியுள்ளார். அந்த கத்தி 7 அங்குலம் இருந்ததால் அவருடைய நெஞ்சு பகுதியில் பாய்ந்தது. இதனால் மல்லிகா அலறிதுடிக்க, அந்த நபர் அங்கிருந்து தப்பி ஓடிவிட்டார்.
இதையடுத்து அக்கம், பக்கத்தினர் அந்த பெண்ணை உடனே மீட்டு சேலம் மோகன் குமாரமங்கலம் அரசு மருத்துவமனையில் அனுமதித்தனர். அங்கு அவரை பரிசோதித்த மருத்துவர்கள், அந்த கத்தி மல்லிகாவின் நெஞ்சு பகுதியில் ஆழமாக இறங்கியிருப்பது தெரியவந்தது. அதனைத்தொடர்ந்து உடனே அவர் மேல் சிகிச்சைக்காக கடந்த 26ஆம் தேதி கோவை அரசு மருத்துவமனைக்கு அனுப்பி வைக்கப்பட்டார்.
அங்கு இதய அறுவை சிகிச்சைத்துறை பிரிவில் உள்நோயாளியாக சேர்க்கப்பட்ட அப்பெண்ணுக்கு மருத்துவர்கள் எக்ஸ்ரே எடுத்து பார்த்தபோது, அவருடைய நெஞ்சு பகுதியில் 6 அங்குல அளவுக்கு கத்தி உள்ளே இறங்கியிருப்பதும், 1 அங்குல கைப்பிடி மட்டும் வெளியே இருப்பதும் தெரிந்தது. ஆனால் அந்த கத்தி நுரையீரல் தவிர மற்ற உறுப்புகளை பாதிப்பை ஏற்படுத்தவில்லை என்பதால், அவருக்கு அறுவை சிகிச்சை செய்து அந்த கத்தியை அகற்ற மருத்துவர்கள் முடிவு செய்தனர்.
அதனைத்தொடர்ந்து மல்லிகாவுக்கு டீன் காளிதாஸ் தலைமையில் மருத்துவ குழுவினர் அறுவை சிகிச்சை செய்தனர்.. 30 மணி நேரம் அவரது நெஞ்சில் இருந்த கத்தியை வெற்றிகரமாக அவர்கள் அகற்றினார்கள். அதுமட்டுமில்லாமல் நுரையீரலில் ஏற்பட்ட பாதிப்பும் சரி செய்யப்பட்டு தற்போது அவர் நலமுடன் வீட்டுக்கு திரும்பியுள்ளார்..
