மருத்துவ படிப்பில் அகில இந்திய ஒதுக்கீட்டு இடங்களில் இதர பிறப்படுத்தப்பட்ட வகுப்பினருக்கு 50% இடஒதுக்கீடு வழங்கக்கோரி சென்னை உயர்நீதிமன்றத்தில் வழக்கு தொடரப்பட்டது.
மருத்துவம் மற்றும் பல்மருத்துவம் படிப்புகளுக்காக அகில இந்திய ஒதுக்கீட்டுகளுக்கு இடங்களை தமிழக அரசு வழங்கி வருகிறது. இளங்கலை படிப்புகளான எம்பிபிஎஸ் மற்றும் பிடிஎஸ் படிப்புகளுக்கு 15%, முதுகலை படிப்பிற்கு எம்டிஎம்எஸ், எம்டிஎஸ் மற்றும் டிப்ளமோ படிப்புகளுக்கு 50% இடங்களையும் அகில இந்திய ஒதுக்கீடாக வழங்கப்படுகிறது.
நீட் தேர்வு மதிப்பெண் அடிப்படையில் இந்த இடங்களுக்கான கலந்தாய்வு மத்திய அரசு சார்பில் நடத்தப்பட்டு வருகிறது. இவ்வாறு ஒதுக்கீடு செய்யப்பட்ட இடங்களில் எஸ்சிஎஸ்டி வகுப்பினர், மாற்றுத்திறனாளிகள் தவிர இதர பிற்படுத்தப்பட்ட வகுப்பினருக்கு இடஒதுக்கீடு முறையில் சேர்க்கை நடத்தப்படுவது கிடையாது.
மற்ற அனைத்து பிரிவுகளையும் பொதுப்பிரிவாக அமைத்து மாணவர் சேர்க்கை நடத்தப்பட்டு வருகிறது. இதனால் இதர பிற்படுத்தப்பட்ட வகுப்பினருக்கு கிடைக்க வேண்டிய வாய்ப்புகள் குறைக்கப்படுகிறது. இதனால் ஓபிசி பிரிவினருக்கு 50% இடஒதுக்கீடு வழங்கக்கோரி தமிழக அரசு, திமுக, பாமக, மதிமுக உள்ளிட்ட அரசியல் காட்சிகள் சார்பில் தனித்தனியாக வழக்கு தொடரப்பட்டது.
இந்த வழக்கை விசாரித்த உச்சநீதிமன்றம் சென்னை உயர்நீதிமன்றத்தை நாட அறிவுறுத்தியது. அதன்படி திமுக, பாமக, மதிமுக சார்பில் வழக்கு தொடரப்பட்டது. இந்த நிலையில் அதிமுக சார்பிலும் வழக்கு தொடரப்பட்டுள்ளது. தமிழகத்தில் உள்ள மருத்துவக்கல்லூரிகளில் ஓபிசி பிரிவினருக்கு 50% இடஒதுக்கீடு கோரி சென்னை உயர்நீதிமன்றத்தில் அதிமுக சார்பில் மனு தாக்கல் செய்யப்பட்டுள்ளது.
விழுப்புரம் வடக்கு மாவட்ட அதிமுக செயலாளரும், சட்டத்துறை அமைச்சருமான சி.வி.சண்முகம் உயர்நீதிமன்றத்தில் மனு தாக்கல் செய்திருந்தார். இந்த நிலையில் தமிழக அரசு சார்பில் தொடரப்பட்ட மனுவும், மதிமுக சார்பில் தொடரப்பட்ட மனுக்களும் இன்று விசாரணைக்கு வந்தன.
அப்போது, இது தொடர்பாக மத்திய அரசு பதிலளிக்க சென்னை உயர்நீதிமன்றம் உத்தரவிட்டுள்ளது. மேலும் இதே கோரிக்கையை வலியுறுத்தி திமுக, அதிமுக, பாமக உள்ளிட்ட அரசியல் கட்சிகள் தொடர்ந்த வழக்குடன் இந்த மனுக்களையும் இணைத்து விசாரணைக்கு எடுக்குகொளப்படும் என தெரிவித்தனர். மேலும் வழக்கின் விசாரணையை வரும் 22ம் தேதி தள்ளிவைத்து உத்தரவிட்டனர்.