வீட்டில் கஞ்சா பதுக்கி வைத்திருந்த 3 பேரை கைது செய்து, அவரிடமிருந்த 141 கிலோ கஞ்சா, 80 ஆயிரம் ரொக்கப்பணம் மற்றும் பைக்கை போலீசார் பறிமுதல் செய்தனர்.
மதுரை மாவட்டம் திருமங்கலம் மற்றும் அதன் சுற்றுவட்டார பகுதிகளில் கஞ்சா விற்பனை அதிகரித்து வருவதாக மாவட்ட எஸ்.பி மணிவண்ணனுக்கு ரகசிய தகவல் வந்தது.
இந்த தகவலையடுத்து எஸ்.பி மணிவண்ணன் உத்தரவின் பேரில் தனிப்படை அமைக்கப்பட்டு கஞ்சா விற்பனை செய்து வருபவர்களை வலைவீசி தேடிவந்தனர்.. இந்தநிலையில் தனிப்படை போலீசார் நேற்று மாலை திருமங்கலம் உசிலம்பட்டி சாலையிலுள்ள காங்கேயநத்தம் விலக்கு அருகே வாகன சோதனையில் ஈடுபட்டு கொண்டிருந்தனர்.
அப்போது அந்த வழியாக வந்த பைக்கை நிறுத்தி விசாரணை நடத்தியபோது, இருவதும் முன்னுக்குப் பின் முரணாக தகவல் அளிக்கவே வாகனத்தை போலீசார் சோதனை செய்ததில், 6.5 கிலோ கஞ்சா மற்றும் 80,190 ரூபாய் ரொக்க பணம் மறைத்து வைத்திருந்தது தெரியவந்தது.
இதையடுத்து 2 பேரையும் கைது செய்து சிந்துபட்டி போலீஸ் ஸ்டேஷன் அழைத்துச் சென்று விசாரணை மேற்கொண்டனர்.. இதில் பைக்கில் வந்தவர்கள் தேனி மாவட்டம் வருஷ நாட்டைச் சேர்ந்த கண்ணன் மற்றும் பொன்னாங்கன் என்பதும், அவர்கள் திருமங்கலம் அசோக் நகர் பகுதியில் இருக்கும் விஜயன் என்பவரிடமிருந்து விற்பனைக்காக கஞ்சா வாங்கி சென்றதாக கொடுத்த தகவலின் அடிப்படையில் தனிப்படை போலீசார் திருமங்கலத்திலுள்ள விஜயன் வீட்டில் சோதனை போட்டனர்.
இந்த அதிரடி சோதனையில் வீட்டுக்குள் 135 கிலோ கஞ்சா பதுக்கி வைத்திருந்தது தெரியவந்தது. இதையடுத்து தனிப்படை போலீசார் விஜயனை கைது செய்து 135 கிலோ கஞ்சாவை பறிமுதல் செய்தனர்.. இதையடுத்து நடத்தப்பட்ட விசாரணையில், அவர் திருமங்கலம் அருகே உள்ள குமராபுரத்தைச் சேர்ந்தவர் என்பதும், திருமங்கலத்தில் பிஸ்கட், வெங்காயம் உள்ளிட்ட பலசரக்கு வாங்கிவந்து மொத்தமாக விற்பனை செய்து வருவது தெரியவந்தது.
மேலும் ஆந்திராவில் இருந்து மொத்தமாக கஞ்சாவை கடத்தி வந்து வீட்டில் வைத்து கொண்டு ஆங்காங்கே சில்லறை விற்பனை செய்து வந்தது விசாரணையில் தெரியவந்தது. இந்தநிலையில், விஜயனுக்கு உதவியாகயிருந்த கிருஷ்ணன் என்பவர் தலைமறைவாகிவிட்டார். அவரை போலீசார் தீவிரமாக தேடி வருகின்றனர்.. பலசரக்குகளை மொத்தமாக வாங்கி விற்பனை செய்வதாக கூறி வீட்டில் கஞ்சா பதுக்கி வைத்து விற்பனை செய்தவர் கைது செய்யப்பட்டுள்ள சம்பவம் அப்பகுதியில் பெரும் பரபரப்பை ஏற்படுத்தியுள்ளது.