நடிகர் கமலை தொடர்ந்து மருத்துவமனையில் இருக்கக்கூடிய பொன்னம்பலத்தின் மருத்துவ செலவுகளை ஏற்றுக் கொள்வதாக நடிகர் ரஜினிகாந்த் தெரிவித்துள்ளார்.
தமிழ் சினிமாவின் ஆகச் சிறந்த வில்லனாக நடித்து வந்தவர் நடிகர் பொன்னம்பலம். இவர் தற்போது சிறுநீரக கோளாறு பிரச்சனை காரணமாக மருத்துவமனையில் இருப்பதாக வீடியோ ஒன்று வைரலானது. இதைப் பார்த்த பல சினிமா துறையைச் சேர்ந்தவர்கள் அதிர்ச்சி அடைந்து அவருக்கு உதவ முன்வந்தனர். அந்த வகையில், நடிகர் கமலஹாசன் பொன்னம்பலத்தின் குழந்தைகளுக்கான கல்வி செலவை தாமே முழுவதுமாக ஏற்றுக் கொள்வதாக தெரிவித்துள்ளார்.
அதேபோல் நடிகர் ரஜினிகாந்த் பொன்னம்பலம் அவர்களை தொலைபேசி மூலமாக தொடர்பு கொண்டு உடல் நலம் குறித்து விசாரித்ததோடு, மருத்துவ செலவுகள் அனைத்தையும் ஏற்றுக் கொள்வதாக தெரிவித்துள்ளார். சினிமாவின் உச்ச நட்சத்திரங்களாக உயர்ந்து நிற்கும் கமலும், ரஜினிகாந்தும் உள்ளத்திலும் உயர்ந்தவர்கள் தான் என்பதை இந்த சம்பவம் காட்டியுள்ளது.
