சுஷாந்த் தற்கொலை குறித்து பரவிய செய்தி பொய்யானது என்று தனது டுவிட்டர் பக்கத்தில் பதிவிட்டு, தன்னை மிரட்டியவர்களை போலீஸ் கைது செய்துள்ளதாக அவர் கூறியுள்ளார்.
“பாதாள் லோக்” போன்ற பல்வேறு வெப் சீரிஸ் மற்றும் பல திரைப்படங்களில் நடித்தவர் சுவஸ்திகா முகர்ஜி. இந்த மாதம் வெளியாக உள்ள “தில் பெச்சாரா” படத்திலும் ஒரு முக்கிய கதாபாத்திரத்தில் நடித்துள்ளார். கடந்த சில நாட்களுக்கு முன்பு சுஷாந்த் மரணத்தைக் குறிப்பிட்டு ‘இப்பொழுதெல்லாம் தற்கொலை என்பது ஒரு ஃபேஷனாகிவிட்டது’ என்று ஸ்வஸ்திகா கூறியதாக ஒரு தனியார் ஊடகம் ஒன்றில் செய்தி வெளியாகியிருந்தது. அதை பலரும் சமூக வலைதளங்களில் பகிர்ந்து கண்டனம் தெரிவித்து வந்தனர். டுவிட்டர் மற்றும் பேஸ்புக் பக்கங்களில் பலரும் அவரை திட்டி தீர்த்துள்ளனர். இந்நிலையில் தான் கூறியதாக ஒரு செய்தி வெளியிட்ட நிருபர் மற்றும் தன் மீது ஆசிட் வீசப் போவதாக கூறி சமூகவலைதளங்களில் மிரட்டல் விடுத்த இளைஞர் ஆகிய இருவரையும் போலீசார் கைது செய்துள்ளதாக தனது அதிகாரப்பூர்வ முகநூல் பக்கத்தில் அவர் தெரிவித்துள்ளார்.
இதுபற்றி அவர் கூறுகையில்,”தற்கொலை என்பது ஒரு ஃபேஷனாகி விட்டது” என்று நான் கூறியதாக கடந்த ஜூன் 26-ம் தேதி அன்று இணைய ஊடகங்களில் பொய்யான செய்தி ஒன்று வெளியானது. அதனைத் தொடர்ந்து சமூக வலைத்தளங்களில் பலரும் கடும் வார்த்தைகளால் என் மீது கடும் தாக்குதல்களைத் தொடுத்து வந்தனர். சிலர் பாலியல் தொடர்பாகவும் கொலை செய்து விடுவதாகவும் மிரட்டினார்கள். அந்த பொய்யான செய்தியை பரப்பிய ஷூவம் சக்ரபோர்த்தி என்ற மேற்கு வங்கத்தை சேர்ந்த நிருபர் கொல்கத்தா போலீசாரால் கைது செய்யப்பட்டார். என்பதை நான் உங்களிடம் தெரிவித்துக்கொள்கிறேன். தான் சமூகத்தில் வேண்டுமென்றே தவறான செய்தியை பரப்பியதாக அவர் ஒப்புக்கொண்டார். அது மட்டுமில்லாமல் என் மீது ஆசிட் வீசுவதாக மிரட்டல் கொடுத்த கவுசிக் தாஸ் என்பவரையும் கைது செய்துள்ளனர். விரைவாக நடவடிக்கை எடுத்த கொல்கத்தா சைபர்கிரைம் போலீசாருக்கு எனது நன்றிகள்” இவ்வாறு அவர் பதிவிட்டுள்ளார்.