தமிழகத்தில் அரசுப் பள்ளிகளில் ஆகஸ்ட் 3ம் தேதி முதல் மாணவர் சேர்க்கை நடைபெறும் என தமிழக கல்வித்துறை அறிவித்துள்ளது.
நாடு முழுவதும் கொரோனா ஊரடங்கால் கடந்த மார்ச் மாதம் மூடப்பட்ட கல்வி நிறுவனங்கள் இன்னும் திறக்கப்படவில்லை. ஆனால் தனியார் பள்ளிகள் ஆன்லைன் மூலம் மாணவர் சேர்க்கை நடத்தி, பாடங்களை தொடங்கியுள்ளது. ஆனால் அரசுப் பள்ளிகள் இன்னும் திறக்கப்படவில்லை. வழக்கமாக ஜூன் மாதத்தில் கோடை விடுமுறை முடிந்து பள்ளிகள் திறக்கப்படும் போது மாணவர் சேர்க்கை நடத்தப்படும். ஆனால் இந்த ஆண்டு அரசுப் பள்ளிகளில் இதுவரை மாணவர் சேர்க்கை நடத்தப்பட வில்லை.
இந்நிலையில் தமிழகத்தில் ஊரடங்கு முடிந்தவுடன் அரசுப்பள்ளிகளில் ஆகஸ்ட் 3ம் தேதி முதல் மாணவர் சேர்க்கை நடைபெறும் என தமிழக பள்ளி கல்வித்துறை அறிவித்துள்ளது. 6 முதல் 10ஆம் வகுப்பு வரை மாணவ மாணவியர் சேர்க்கை ஆகஸ்ட் 3ம் தேதி முதல் நடைபெறும் என்றும், மாணவ மாணவிகளுக்கு விண்ணப்ப படிவமும் அன்றே வழங்கப்படும் என்றும் குறிப்பிடப்பட்டுள்ளது. பதினொன்றாம் வகுப்பு மாணவர்களுக்கு ஆகஸ்ட் 10 ஆம் தேதியிலிருந்து விண்ணப்பம் வினியோகம் செய்யப்படும் என்றும், கொரோனா காலத்தில் கூட்டம் சேரக்கூடாது என்பதை புரிந்து கொண்டு பெற்றோர்கள் ஒத்துழைக்குமாறு கேட்டுக் கொள்ளப்பட்டு உள்ளது.