நடிகரும் பாடலாசிரியருமான ஹிப்ஹாப் ஆதி ஊரடங்கு முடிந்ததும் மீண்டும் படம் இயக்குவேன் என கூறியுள்ளார்.
2012 ம் ஆண்டு வெளியான ஹிப்ஹாப் தமிழா இசை ஆல்பம் ரசிகர்கள் மத்தியில் பெறும் வரவேற்பு பெற்றது. அதன்பின் ஆதிக்கு திரைப்படங்களில் இசையமைக்க வாய்ப்புகள் குவிந்தன. இவர் ஆம்பள, தனி ஒருவன், கதகளி, கத்தி சண்டை, கலகலப்பு 2, இமைக்கா நொடிகள், ஆக்ஷன், கோமாளி உள்ளிட்ட பல படங்களுக்கு இசையமைத்துள்ளார். மேலும் மீசைய முறுக்கு படத்தை இயக்கி கதாநாயகனாகவும் நடித்துள்ளார். நட்பே துணை மற்றும் நான் சிரித்தால் படங்களிலும் கதாநாயகனாக நடித்துள்ளார்.சினிமா துறையில் நடிகர், இயக்குனர், அமைப்பாளர், பாடகர், பாடலாசிரியர் என வலம் வரும் ஆதி தற்போது ‘நான் ஒரு ஏலியன்’ என்ற புதிய இசை ஆல்பத்தை உருவாக்கியுள்ளார்.
இதுகுறித்து அவர் கூறுகையில் ” எனது ஹிப்ஹாப் தமிழா இசை ஆல்பத்திற்கு பெரிய வரவேற்பு கிடைத்தது. தற்போது கொரோனா ஊரடங்கில் ஹிப் ஹாப் இசைக்கு ஏலியன் ஆக நான் விரும்புவதை பிரதிபலிப்பது போல “நான் ஒரு ஏலியன்” இசை ஆல்பத்தை உருவாக்கியுள்ளேன். இதில் 6 பாடல்களை நானே எழுதி பாடி இசையமைத்துள்ளேன். இது சுதந்திர தினத்தன்று வெளியாகும். இரண்டு படங்களில் என்னை கதாநாயகனாக நடிக்க ஒப்பந்தம் செய்துள்ளனர். ஊரடங்கு முடிந்ததும் படப்பிடிப்பு துவங்கும். மீண்டும் படம் இயக்குவேன். மீசைய முறுக்கு படம் போல புதிய படம் இயக்க கதை எழுதி வருகிறேன்” என அவர் கூறியுள்ளார்.