“வரவேற்க யாரும் வரவில்லை” லண்டன் சென்ற தலைவாசல் விஜய்…. கொரோனா அச்சத்திற்கு இடையே பகிர்ந்த அனுபவம்….!!

கொரோனா தாக்கத்திற்கு இடையில் லண்டன் சென்ற புகழ்பெற்ற நடிகர் தலைவாசல் விஜய் அவரது அனுபவத்தை கூறியுள்ளார்.

தமிழ் சினிமாவில் முன்னணி குணச்சித்திர நடிகராக திகழ்ந்து கொண்டிருப்பவர் தலைவாசல் விஜய். இவர் பெல்பாட்டம் என்ற ஹிந்தி திரைப்படம் ஒன்றில் நடிக்க உள்ளார். அந்தத் திரைப்படத்தின் படப்பிடிப்பை லண்டனில் நடத்துவதற்கு படக்குழுவினர் திட்டமிட்டிருந்த நிலையில், படக்குழுவினருடன் தலைவாசல் விஜய்யும் லண்டனுக்கு சென்றுள்ளார். கொரோனா தாக்கத்திற்கு இடையில் லண்டனில் இருக்கின்ற தலைவாசல் விஜய் கூறும்போது, “ஊரடங்கு காலத்தில் படப்பிடிப்பிற்காக லண்டன் வந்தது வித்தியாசமான மற்றும் தனித்துவமான அனுபவமாக இருந்தது. விமான நிலையத்தில் ஒருவர் கூட எங்களை வரவேற்பதற்காக வரவில்லை.

விமான நிலையம் முழுவதும் ஆள் நடமாட்டம் இல்லாமல் வெறிச்சோடி கிடந்தது. நாங்களே எங்களுடைய பொருள்கள் அனைத்தையும் தங்கியிருக்கும் ஹோட்டலுக்கு எடுத்துச் சென்றோம்”  என கூறியுள்ளார். அதே சமயத்தில் நடிகர்கள் அனைவரும் தனிமைப்படுத்துதலை கடைபிடிக்க வேண்டும் என்றும் ஒவ்வொரு நடிகருக்கும் ஒரு மருத்துவர் ஏற்பாடு செய்யப்பட்டுள்ளதாகவும், படப்பிடிப்பு தொடங்குவதற்கு முன்னர் முழு பரிசோதனை செய்த பிறகே அனைவரும் படப்பிடிப்பிற்கு அனுமதிக்கப்படுவார்கள் என்றும் கூறியுள்ளார்.