தமிழகத்தில் இன்று 6,005 பேர் குணமடைந்து வீடு திரும்பி இருப்பது மக்களுக்கு மகிழ்ச்சியை ஏற்படுத்தியுள்ளது.
தமிழகத்தில் கொரோனா பாதிப்பு நாளுக்கு நாள் அதிகரித்துக் கொண்டே வருவது, மக்களுக்கு அதிர்ச்சியை அளிக்கும் வகையில் இருந்தாலும், குணமடைந்து வீடு திரும்புவோர் எண்ணிக்கையும் உயர்ந்து கொண்டே செல்வது மக்களுக்கு நம்பிக்கை அளிக்கும் வகையில் இருக்கின்றது. தமிழக அரசும் கொரோனாவை கட்டுப்படுத்த பல்வேறு கட்ட நடவடிக்கைகளை மேற்கொண்டு, உயிரிழப்புகளை குறைத்து, அதிகமானோரை குணப்படுத்த முனைப்பு காட்டி வருகிறது. அதன் பலனாக நாளுக்கு நாள் அதிகமானோர் கொரோனாவில் இருந்து மீண்டு வீடு திரும்பி வருகின்றனர்.
இந்நிலையில் இன்று கொரோனா பாதிப்பு குறித்த விவரங்களை சுகாதாரத்துறை வெளியிட்டது. அதில், இன்று தமிழகத்தில் இன்று மட்டும் 65,490 பேருக்கு பரிசோதனை செய்யப்பட்டுள்ளது. இதனால் மொத்த பரிசோதனை 32,40,339 ஆக இருக்கின்றது. இன்று புதிதாக 5,834 பேருக்கு தொற்று உறுதி செய்யப்பட்டுள்ளதால் பாதிக்கப்பட்டோர் எண்ணிக்கை 3,02,815 ல் இருந்து 3,08,649 ஆக அதிகரித்துள்ளது. இன்று ஒரே நாளில் 118 பேர் உயிரிழந்துள்ளனர். இதனால் உயிரிழந்தவர்களின் எண்ணிக்கை 5,041 ல் இருந்து 5,159 ஆக அதிகரித்துள்ளது.
அதே நேரத்தில் இன்று 6,005 பேர் பூரண குணமடைந்து வீட்டுக்கு திரும்பியுள்ளனர். இதனால் கொரோனாவால் பாதிக்கப்பட்டு குணமடைந்தவர்களின் எண்ணிக்கை 2,44,675 ல் இருந்து 2,50,680 ஆக உயர்ந்துள்ளது. இதனால் தொற்றால் பாதிக்கப்பட்டவர்களில் இதுவரை 81.22% பேர் குணமடைந்துள்ளனர். தற்போது தமிழகத்தில் 52,810 பேர் மருத்துவமனையில் சிகிச்சை பெற்று வருகின்றனர்.
கடந்த சில நாட்களாக பாதிக்கப்பட்டவர்களை விட குணமடைந்து வீடு திரும்பியவர்களின் எண்ணிக்கை அதிகரித்து வரும் நிலையில், இன்றும் பாதிக்கப்பட்டவர்களை விட குணமடைந்து வீடு திரும்பியவர்களின் எண்ணிக்கை அதிகரித்திருப்பது ஆறுதல் அளிக்கிறது. அதே சமயத்தில் இதுவரை குணமடைந்தவர்களின் எண்ணிக்கை 2 லட்சத்து 50 ஆயிரத்தை கடந்திருப்பதால் தமிழக மக்கள் சற்று மகிழ்ச்சி அடைகின்றனர்.