வருகின்ற 2021 ஆம் ஆண்டு தமிழக சட்டப்பேரவை தேர்தல்கள் நடைபெறுகின்றது. இதற்கான முன்னேற்பாடுகளை அரசியல் கட்சிகள் மேற்கொண்டு வருகின்றன. தொடர்ந்து தேர்தல் வியூகங்கள் வகுக்கப்படுகின்றன. கூட்டணி குறித்த விவாதம் எழுந்துள்ளது. இதனிடையே ஆளும் கட்சியான அதிமுகவில் எழுந்துள்ள பிரச்சனை தான் தமிழகத்தின் ஹாட் டாப்பிக்காக இருந்து கொண்டிருக்கின்றது. வரக்கூடிய தேர்தலில் முதலமைச்சர் யார் என்ற கேள்வி மிகப்பெரிய விவாதப் பொருளாக மாறியுள்ளது.
தமிழக அமைச்சர்களில் ஒரு தரப்பினர்… தேர்தலில் வெற்றி பெற்று சட்டமன்ற உறுப்பினர்கள் ஒன்றுகூடி முதல்வரை தேர்ந்தெடுப்போம் என்றும், ஒரு தரப்பினரும் எடப்பாடி பழனிச்சாமி தான் முதலமைச்சர் என்றும் மாறி மாறி கருத்துக்களைப் பகிர்ந்து வருகின்றனர். இது ஆளும் தரப்புக்கு சிக்கலை ஏற்படுத்தியுள்ளது. இந்த நிலையில்தான் தற்போது தமிழக துணை முதல்வரும், அதிமுக வின் ஒருங்கிணைப்பாளருமான ஓ பன்னீர்செல்வம் இது குறித்த கருத்தை தனது ட்விட்டரில் தெரிவித்துள்ளார்.
அதில், தாய்வழி வந்த தங்கங்கள் எல்லாம் ஓர்வழி நின்று நேர்வழி சென்றால் நாளை நமதே! தொடர்ந்து 3-வது முறையாக 2021-ஆம் ஆண்டில் சட்டப்பேரவைத் தேர்தலில் மகத்தான வெற்றி பெறுவது ஒன்றே அ.இ.அ.தி.மு.கவின் இலக்கு. அதுவே மாண்புமிகு அம்மா அவர்களின் கனவு. அதனை நனவாக்க கடமை, கண்ணியம், கட்டுப்பாட்டுடன் அனைவரும் பொறுப்புணர்வோடு செயல்பட வேண்டும் என்பது எனது அன்பு வேண்டுகோள்!