மூணாறு நிலச்சரிவில் இதுவரை 55 பேர் உயிரிழந்த நிலையில் மேலும் ஒருவர் உயிரிழந்ததை மீட்பு பணி வீரர்கள் கண்டுபிடித்துள்ளனர்.
கேரள மாநிலம், மூணாறில் ராஜமலை பெட்டிமுடி பகுதி இருக்கிறது. இங்கு தேயிலை தோட்டத் தொழிலாளர்களுக்காக கட்டிக் கொடுத்த கட்டடம் சென்ற ஆகஸ்ட் 6ஆம் தேதி இரவு ஏற்பட்ட நிலச்சரிவில் மண்ணில் புதைந்து விபத்துக்குள்ளானது. இந்த விபத்தில் 80க்கும் மேலானோர் சிக்கியிருக்கலாம் என யூகிக்கபட்ட நிலையில், தீயணைப்புத் துறையினர், காவல் துறையினர், பேரிடர் மீட்புக் குழுவினர் விபத்தில் சிக்கியவர்களை மீட்கும் பணிகளில் தீவிரமாக செயலாற்றி வருகின்றனர்.
தற்போது வரை 55 பேர் நிலச்சரிவில் உயிரிழந்த நிலையில், இன்று மேலும் ஒருவரின் சடலத்தை மீட்புப் படையினர் கண்டெடுத்துள்ளனர். இதனால், மூணாறு நிலச்சரிவால் உயிரிழந்தோரின் எண்ணிக்கை 56ஆக அதிகரித்துள்ளது. மேலும், நிலச்சரிவில் காணாமல் போன 14 பேரை மாநில மற்றும் தேசிய அளவிலான பேரிடர் மீட்புப் பணிக் குழுவைச் சேர்ந்த வீரர்கள் தொடர்ந்து தேடுதல் பணியில் ஈடுபட்டு வருகின்றனர்.