பெண்ணின் பிரசவத்திற்காக டிராக்டர் மூலம் மருத்துவமனைக்கு அழைத்துச் சென்ற போலீசாரை அப்பகுதி மக்கள் பாராட்டி வருகின்றனர்.
தெலுங்கானா மாநிலத்தில் கடந்த சில தினங்களாக பலத்த மழை காரணமாக தாழ்வான பகுதிகளில் வெள்ளம் சூழ்ந்து இருக்கிறது. அதனால் பல்வேறு சாலைகளில் அரிப்பு ஏற்பட்டு போக்குவரத்து பாதிக்கப்பட்டு இருக்கிறது. மஞ்சேரியல் மாவட்டம் சென்னூர் அருகே உள்ள ஒரு கிராமத்தில் உள்ள குளம் நிரம்பி, ஓடையில் தண்ணீர் பெருக்கெடுத்து ஓடுவதால் சாலை முழுவதும் மூழ்கிய நிலையில் உள்ளது. இதனால் போக்குவரத்து துண்டிக்கப்பட்டு, கிராம மக்கள் வெளியில் செல்ல முடியாத நிலை உள்ளது. இந்நிலையில், அந்த கிராமத்தைச் சேர்ந்த ஒரு கர்ப்பிணி பெண்ணுக்கு பிரசவ வலி ஏற்பட்டது.
பிரசவத்திற்காக சென்னூரில் இருக்கும் மருத்துவமனைக்கு கொண்டு செல்ல வேண்டும். ஆனால், சாலை மூழ்கி கிடப்பதால் அவர்களால் மருத்துவமனைக் செல்ல முடியவில்லை. இதையடுத்து அந்த பெண்ணை போலீசார் ஒரு டிராக்டரில் ஏற்றி தண்ணீர் சூழ்ந்த சாலை வழியாக மருத்துவமனைக்கு கொண்டு சென்றனர். போலீசாரின் இந்த சேவையை கிராம மக்கள் வெகுவாக பாராட்டி உள்ளனர்.