வீட்டிலிருந்து கல்வி தொலைக்காட்சியை பார்ப்பதை வைத்து மாணவர்களின் வருகைப் பதிவேடு கணக்கிட முடியும் என அமைச்சர் செங்கோட்டையன் அறிவித்துள்ளார்.
ஈரோடு மாவட்டம் நம்பியூர் பேரூராட்சிக்கு பாத்தியப்பட்ட சந்தன குளத்தில் உள்ள குடிமராமத்து பணிகளை பூமி பூஜை செய்து, அமைச்சர் செங்கோட்டையன் தொடங்கி வைத்தார். அதன்பின் ஊராட்சி ஒன்றிய அலுவலகத்தில் தூய்மை பணியாளர்களுக்கு கொரோனா பணிகளை சிறப்பாக செய்து வந்ததற்காக நற்சான்றிதழ்களை வழங்கினார்.
அதன்பின் செய்தியாளர்களை சந்தித்து பேசிய அவர், காலத்தின் தேவைக்கு ஏற்றவாறு பாடங்களை குறைக்கலாமா? வேண்டாமா? என்பது குறித்து முதலமைச்சர் அறிவிப்பார் என தெரிவித்தார். மேலும் அரசுப் பள்ளிகளில் மாணவர் சேர்கை மற்றும் பள்ளி மாற்று சான்றிதழை வாங்க பணம் ஏதும் கேட்க கூடாது என கூறினார். அதன்பின் வீட்டிலிருந்து கல்வி தொலைக்காட்சி டிவியை பார்ப்பதை வைத்து மாணவர்களின் பதிவேடு எடுக்கப்படும் எனவும் அவர் தெரிவித்தார்.