இஸ்ரேலில் இருந்து ஐக்கிய அரபு அமீரகம் செல்லும் இஸ்ரேல் விமானங்கள் தங்கள் வான் பகுதி வழியாக செல்ல பக்ரைன் அரசு அனுமதி வழங்கியுள்ளது.
இஸ்ரேல் மற்றும் ஐக்கிய அரபு அமீரகம் இடையேயான தூதரக உறவை வலுப்படுத்தும் வகையில் கடந்த மாதம் இரு நாடுகளுக்கும் இடையே வரலாற்று சிறப்புமிக்க அமைதி ஒப்பந்தம் இன்று கையெழுத்தாகியது. அதன் மூலமாக இஸ்ரேலுடன் தூதரக உறவை ஏற்படுத்திக் கொண்ட முதல் வளைகுடா நாடாகவும், மூன்றாவது அரபு நாடாகவும் ஐக்கிய அரபு அமீரகம் திகழ்கிறது. மேலும் இந்த ஒப்பந்தத்தின் மூலமாக இரு நாடுகளுக்கும் இடையே வர்த்தகம், தொலைத்தொடர்பு மற்றும் விமானப் போக்குவரத்து ஆகிய சேவைகள் தொடங்கப்பட்டுள்ளன.
அவ்வகையில் வரலாற்றில் முதன் முதலாக கடந்த திங்கட்கிழமை இஸ்ரேலில் இருந்து விமானம் ஒன்று ஐக்கிய அரபு அமீரகத்திற்கு புறப்பட்டு சென்றது. ஐக்கிய அரபு அமீரகம் விடுத்துள்ள கோரிக்கையை ஏற்றுக் கொண்ட சவுதி அரேபியா, தங்கள் வான் பரப்பை இஸ்ரேல் விமானம் பயன்படுத்திக் கொள்வதற்கு அனுமதி அளித்துள்ளது. இதனைத் தொடர்ந்து சவுதி அரேபியா வான் பரப்பு வழியாக இஸ்ரேல் விமானம் ஐக்கிய அரபு அமீரகத்திற்கு சென்றடைந்தது.
இந்நிலையில் இஸ்ரேல் விமானங்கள் பக்ரைன் நாட்டின் வான் பரப்பை பயன்படுத்திக் கொள்வதற்கு அந்நாடு அனுமதி அளிக்க வேண்டுமென ஐக்கிய அரபு அமீரகம் கோரிக்கை விடுத்துள்ளது. இந்தக் கோரிக்கையை ஏற்றுக்கொண்ட பக்ரைன் அரசு, தங்கள் வான் பகுதி வழியாக இஸ்ரேல் நாட்டின் விமானங்கள் செல்வதற்கு அனுமதி அளித்துள்ளது.