டிராக்டரில் அமர்வதற்கு சோபாவை பயன்படுத்தி பேரணி நடத்தும் காங்கிரஸ் கட்சியின் எம்பி ராகுல் காந்தி விஐபி விவசாயி என்று மத்திய மந்திரி விமர்சனம் செய்துள்ளார்.
மத்திய அரசு நிறைவேற்றியுள்ள வேளாண் சட்டங்களுக்கு எதிராக விவசாயிகள் நடத்தும் போராட்டங்களுக்கு ஆதரவு கொடுத்து காங்கிரஸ் எம்பி ராகுல் காந்தி பஞ்சாப் மற்றும் ஹரியானா மாநிலங்களில் நடத்தும் மூன்று நாள் டிராக்டர் பேரணி நேற்று முன்தினம் தொடங்கியுள்ளது. இரண்டாவது நாளான நேற்று பஞ்சாபில் டிராக்டர் பேரணியில் ராகுல் காந்தி கலந்து கொண்டார். இது குறித்து விமர்சனம் செய்துள்ள மத்திய மந்திரி ஸ்மிரிதி கூறுகையில், “டிராக்டரில் அமர்வதற்கு சோபாவை பயன்படுத்துகிறார் ராகுல் காந்தி.
அவரைப்போன்ற பிஐபி விவசாயிகளால் இடைத்தரகர்களின் பிடியில் சிக்கியுள்ள அனைத்து விவசாயிகளையும் விடுவிக்க கூடிய சட்டத்தை ஆதரிக்க முடியாது. காங்கிரஸ் கட்சி ஆட்சிக்கு வந்தால் இந்த சட்டங்கள் அனைத்தும் குப்பையில் போடப்படும் என்று ராகுல் காந்தி கூறியுள்ளார். ஆனால் அவ்வாறு நடக்காது. ஏனென்றால் காங்கிரஸ் கட்சி ஒருபோதும் ஆட்சிக்கு வராது. ராகுல் காந்தியின் கனவு கட்டாயம் நிறைவேறாது”என்று அவர் கூறியுள்ளார்.