அதிமுக செய்த பிறகுதான் திமுக அனைத்தையும் செய்துவருவதாக அமைச்சர் ஆர்.பி. உதயகுமார் தெரிவித்துள்ளார்.
திமுக சார்பில் அமைக்கப்பட்டுள்ள தேர்தல் அறிக்கை தயார் செய்யும் குழு ஆலோசனை கூட்டம் இன்று சென்னை அண்ணா அறிவாலயத்தில் நடைபெற்றது. இந்நிலையில் அதிமுக செய்த பிறகுதான் திமுக இவற்றையெல்லாம் செய்துவருவதாக அமைச்சர் ஆர்.பி. உதயகுமார் கூறியுள்ளார். இதுகுறித்து மதுரையில் நடந்த செய்தியாளர் சந்திப்பில் அவர் கூறுகையில், “தேர்தல் நெருங்கி வருகின்ற நிலையில் அனைத்து கட்சிகளும் தேர்தல் அறிக்கை தயாரிக்கும் குழு, விளம்பரக் குழு என்ற பல்வேறு குழுக்களை அமைத்து வருவார்கள். அதிமுக இதை எல்லாம் செய்த பிறகு தான் திமுக இதனை செய்து வருகிறது.
அவ்வகையில் தேர்தல் களத்தில் அதிமுக தான் முன்னணியில் இருக்கின்றது. மக்களை நேரில் சந்திப்பதிலும், மக்களுக்கு சேவை செய்வதிலும் தமிழக முதலமைச்சர் எடப்பாடி பழனிசாமி தான் முன்னணி வகித்து வருகிறார். தேர்தல் அறிக்கை என்பது கட்சியின் பொக்கிஷம். அது மட்டுமே மக்களின் கவனம் மற்றும் செல்வாக்கு, வாக்குகள் அனைத்தையும் பெறக் கூடியது. அதனால் அது மிகவும் முக்கியமான பணி. அதிமுகவின் தேர்தல் அறிக்கை திருவிழா போன்று வெளியிடப்படும்”என்று அவர் கூறியுள்ளார்.